تم النشر بواسطة / ابراهيم فهمى
الطاووس وهاد
لازم تعتذر
انتظر عشان لازم تعتذر
اسمع كلامي ياحبيبي وانتظر
عايزه اقولك كلام كتير
جايز يكون مفيد ومختصر
كنت لك شمعه ايده
طفاها قلبك لما غدر
كنت لك ورده فواحه
اسرت قلوب كل البشر
ساعات اهيم زي الفراشه
فوق شفايفك تحت المطر
خليتني كاس بلا احساس
كان في ايدك وانكسر
قوللي ازاي انسي قساوتك
من غير ما تيجي وتعتذر
انتظر عشان لازم تعتذر
ضيعت شباب احلي ورده
لما نويت تسيبها تتقطف
الغدر كان عاشق لطبعك
ويبوح بسرك لما نختلف
والصراحه بقت عمله نادره
واللي بينا مسيره يتعرف
كنت باحتاج عطف قلبك
لما كان قلبي بيرتجف
كنت باسامحك كل مره
لما تبدي كلمة اسف
كدبت نفسي وصدقت كلامك
ونسيت انك هاوي ومحترف
انا ضحيت كتير عشانك
ومن حقي انك تعترف
انتظر عشان لازم تعتذر
حسيت بغدرك لما قابلتك
وكلمة وداع جوه عتابك
كدبت عينيا ورعشة ايديا
قلت يمكن لك اسبابك
قلت لنفسي بلاش تأسي
لما بعادك طول غيابك
كنت فاكره اني ح اقدر
اصد قلبك وابعد عذابك
أتاري فيه واحده تانيه
جوه قلبك بتعشق جنابك
عايز اسامحك وارجع تاني
اهيم بحبك واكسب ثوابك
اسفه ياروحي يا كل جروحي
خليني ذكري جوه سرابك
انتظر عشان لازم تعتذر
سمعني صوتك وانت بتعتذر
يمكن اسامحك مره تاني
وريني ازاي تقدر تقاوم
كيد العوازل ونار بركاني
يمكن احنن قلبي عليك
واسمع منك ولو لثواني
ومش ح ارجع لك ابدا تاني
ولو ح ترجع ليا زماني
بلاش تعشم تاني فيا
لاني قتلت فيك حرماني
شوفت بغدرك عملت ايه
ضيعت حبك ويا حناني
انتظر عشان لازم تعتذر
شوفت غرورك ضيع ايه
ضيعك انت وجني عليا
انت عذبت غيري كتير
وكنت أنا اخر ضحيه
تقدر تقوللي ازاي ح تنسي
دمعه سالت من عينيا
علمتني ادوس علي قلبي
وعودت قلبي ع الاسيه
بقيت اتحدي حتي نفسي
غصب عني مش بأيديا
ما تخافش عليا من عنادي
عزة نفسي لسه قويه
أنا ما املكش غير كرامتي
تحمي كياني فوق الدنيا
انتظر عشان لازم تعتذر
بقلم/ وهاد
نبض / دي الكون
ليست هناك تعليقات:
إرسال تعليق