ﻭﺍﺣﺸﻨﻰ ﺑﺠﺪ ﺑﺠﺪ ﻳﺎﺑﺎ
ﻳﺎﻟﻠﻲ ﻛﻨﺖ ﻣﻠﻴﺎﻥ ﻃﻴﺎﺑﺔ
ﻓﺎﺗﺖ ﺍﺩﺍﻡ ﻣﻨﻲ ﺳﻨﻴﻨﻲ
ﻭﺻﻮﺭﺗﻚ ﻣﺎ ﺑﺘﻔﺎﺭﻗﺶ ﻋﻴﻨﻲ
ﻋﺎﻳﺸﺔ ﺑﺤﻨﻴﻨﻲ
ﺏ ﺃﻗﻠﺐ ﺩﺍﻳﻤﺎ ﻟﻴﻼﺗﻲ
ﻛﻞ ﺻﻮﺭﺓ ﻑ ﺃﻟﺒﻮﻣﺎﺗﻲ
ﺟﻤﻌﺖ ﺑﻴﻨﻚ ﻭﺑﻴﻨﻲ
ﻭﻳﻌﻼ ﻫﻤﺴﻲ ﺑﺼﻮﺕ ﺍﻧﻴﻨﻲ
ﻓﻴﻨﻚ ﻳﺎ ﺍﻳﻘﻮﻧﺔ ﺣﻴﺎﺗﻰ
ﺍﻭﻋﻲ ﻳﺎ ﺑﺎﺑﺎ ﺗﻔﻜﺮ ﺍﻧﻚ
ﻏﺎﻳﺐ ﻭﺑﻌﻴﺪ ﻋﻦ ﻋﻴﻨﻲ
ﺩﻩ ﺍﻧﺎ ﺷﺎﻳﻔﺎﻙ ﺩﺍﻳﻤﺎ ﻑ ﻣﻨﺎﻣﻰ
ﺑﺘﻴﺠﻲ ﺯﻱ ﺯﻣﺎﻥ ﺗﺤﻜﻴﻠﻲ
ﺃﺻﺤﻲ ﺁﻻﻗﻴﻨﻲ ﺣﺎﺿﻨﺔ ﻑ ﺻﻮﺭﺗﻚ
ﻭﺃﺗﻤﻨﻰ ﺗﺮﺟﻊ ﺃﺣﻀﺎﻥ ﺑﻨﺘﻚ
ﺍﻳﻪ ﺍﻳﻪ ﺍﻳﻪ !!!!
ﺑﺘﻘﻮﻝ ﻧﺎﺳﻴﺎﻙ ؟ !
ﻃﺎﻭﻋﻚ ﻗﻠﺒﻲ ﺇﻧﻚ ﺗﻨﻄﻘﻬﺎ
ﺩﻩ ﻟﻮ ﻗﻠﺒﻲ ﻓﻜﺮ ﻳﻌﻤﻠﻬﺎ
ﻫﻘﻄﻌﻪ ﻣﻴﻴﻴﻴﻴﺖ ﺣﺘﺔ
ﻭﺃﺭﻣﻴﻪ ﻓﻲ ﻛﻞ ﺳﻜﺔ
ﻭﻫﺘﺴﻤﻊ ﺻﻮﺕ ﺑﻴﺼﺮﺥ ﺑﺸﺪﺓ
ﺑﺎﺑﺎ ﺣﺒﻴﺒﻲ
ﻳﺎ ﻣﻬﻨﻴﻨﻲ
ﻳﺎﻟﻠﻲ ﺻﻮﺭﺗﻚ
ﻧﻦ ﻟﻌﻴﻨﻲ
ﻋﺎﺭﻑ ﺍﻳﻪ ﺃﻛﺘﺮ ﻣﺎ ﺣﺰﻧﻨﻰ
ﻭﻣﻨﻜﺪﻧﻨﻲ ﻭﻣﺰﻋﻠﻨﻲ
ﺇﻧﻚ ﻣﺎ ﺻﺒﺮﺗﺶ ﺇﻧﻲ
ﺃﺷﺒﻊ ﻣﻨﻚ ﺟﻮﺓ ﻑ ﺣﻀﻨﻰ
ﻋﺎﺭﻑ ﻳﺎﺑﺎ
ﺍﻟﺪﻧﻴﺎ ﻓﻲ ﺑﻌﺪﻙ ﺑﻘﺖ ﻏﺎﺑﺔ
ﺍﻟﺨﻠﻖ ﻓﻴﻬﺎ ﺑﺘﺘﻐﺎﺑﻰ
ﻭﺍﻟﻬﻤﻮﻡ ﻣﻦ ﻳﻮﻡ ﺭﺣﻴﻠﻚ
ﺯﺍﺩﺕ ﺧﺎﻟﺺ ﺑﺠﺪ ﻋﻠﻴﺎ
ﻛﻨﺖ ﺯﻣﺎﻥ ﺩﺍﻳﻤﺎ ﺑﺪﻋﻴﻠﻚ
ﺭﺑﻨﺎ ﻳﺤﻔﻈﻚ ﻭﻳﺨﻠﻴﻚ ﻟﻴﺎ
ﻛﺎﻥ ﻧﻔﺴﻰ ﺁﺟﻲ ﻭﺃﺷﻜﻴﻠﻚ
ﻟﻤﺎ ﺍﻟﺪﻧﻴﺎ ﺗﺒﻘﻲ ﻗﺴﻴﺔ
ﺑﺲ ﻳﺎ ﺑﺎﺑﺎ ﺁﺩﻱ ﺍﻟﺪﻧﻴﺎ
ﻳﻮﻡ ﻟﻴﻬﺎ ﻭﺍﻟﺒﺎﻗﻲ ﻋﻠﻴﺎ
ﺍﻭﻗﺎﺕ ﺑﺘﻀﻠﻢ ﻑ ﻋﻨﻴﻴﺎ
ﻣﺎﻻﻗﻴﺶ ﻓﻴﻬﺎ ﺍﻟﻮﺍﻥ ﻓﺎﺗﺤﺔ
ﺍﺟﺮﻱ ﺑﺴﺠﺪﺓ ﻭﺍﺩﻋﻲ ﻟﺮﺑﻲ
ﻭﺍﻗﺮﺃ ﻉ ﺭﻭﺣﻚ ﺍﻟﻔﺎﺗﺤﺔ
ﻭﺑﻌﺪ ﻣﺎ ﻛﺖ ﺍﻟﺴﻜﻚ ﻣﻘﻔﻮﻟﺔ
ﺍﻻﻗﻴﻬﺎ ﺑﺎﻻﺣﻀﺎﻥ ﻓﺎﺗﺤﺔ
ﻛﻞ ﺍﻟﻨﺎﺱ ﺍﻣﺎ ﺗﺰﻭﺭﻧﻰ
ﺑﻴﻘﻮﻟﻮﺍ ﺍﻝ ﺧﻠﻒ ﻣﻤﺎﺗﺸﻰ
ﺍﺭﺩ ﺍﻭﻋﻮﺍ ﺗﻜﻤﻠﻮﺍ
ﺩﻩ ﺑﻘﺎﻟﻪ ﻳﻮﻣﻴﻦ ﺑﺲ ﻣﺎ ﻧﺎﻣﺸﻰ
ﻭﺁﺩﻳﻨﻲ ﺧﻼﺹ ﺭﺍﻳﺤﺔ ﺍﺻﺤﻴﻪ
ﻭﻣﻦ ﻛﻞ ﻋﻴﻮﻧﻜﻢ ﺭﺍﺡ ﺍﺭﻗﻴﻪ
ﺍﺳﻢ ﺍﻟﻠﻪ ﻋﻠﻴﻪ ﻭﺣﻮﺍﻟﻴﻪ
ﺭﺑﻨﺎ ﺩﺍﻳﻤﺎ ﻳﺤﻤﻴﻪ
ﻭﺃﺟﺮﻱ ﺑﺴﺮﻋﺔ ﺟﻮﺓ ﺍﻻﻭﺿﺔ
ﺍﻻﻗﻲ ﺣﺎﺟﺘﻚ ﻭﻓﻲ ﻣﻄﺮﺣﻬﺎ
ﺍﺩﻱ ﻧﻀﺎﺭﺓ ﺍﻟﺸﻤﺲ ﺍﻟﺴﻮﺩﺍ
ﻭﺁﺩﻯ ﻫﺪﻭﻣﻚ ﻭﺍﻟﻮﻻﻋﺔ
ﻭﺍﻟﺒﺎﺭﻓﺎﻥ ﺍﺑﻮ ﺭﺳﻤﺔ ﺳﺎﻋﺔ
ﻣﺘﻠﻤﺴﺘﺶ ﻭﻻ ﺣﺪ ﻗﺘﺤﻬﺎ
ﻧﻔﺴﻲ ﺍﻗﻮﻝ ﺣﺎﺟﺔ ﻳﺎ ﺑﺎﺑﺎ
ﻟﻴﻪ ﻣﺨﺎﺻﻤﻨﻲ ﺯﻱ ﺍﻟﻌﻴﺪ؟ !
ﻭﺍﻟﻠﻪ ﻣﺎﻧﻴﺶ ﻋﺎﻭﺯﺓ ﻋﻴﺪﻳﺔ
ﻳﻜﻔﻴﻨﻲ ﺍﺷﻮﻓﻚ ﻓﺮﺣﺎﻥ ﻭﺳﻌﻴﺪ
ﻟﻴﻪ ﻳﺎ ﺑﺎﺑﺎ ﺭﻭﺣﺖ ﺑﻌﻴﺪ
ﺩﻩ ﺍﻧﺖ ﻭﻋﺪﺗﻨﻰ ﻣﺎ ﺗﺴﻴﺐ ﺍﻻﻳﺪ
ﻓﺎﻛﺮ ﻳﺎ ﺑﺎﺑﺎ ﺯﻣﺎﻥ ﺯﻣﺎﻥ
ﻟﻤﺎ ﻛﻨﺖ ﺑﺘﻤﺴﻚ ﺇﻳﺪﻱ
ﻋﺸﺎﻥ ﺗﺤﺴﺴﻨﻲ ﺑﺎﻻﻣﺎﻥ
ﻭﺍﻟﻠﻪ ﻣﻦ ﻳﻮﻣﻴﻬﺎ ﺧﺪﻭﺩﻯ
ﻣﺘﻌﺮﻓﺶ ﻟﻠﻀﺤﻜﺔ ﻣﻜﺎﻥ
ﻛﻞ ﺍﻟﻠﻲ ﻋﻠﻴﻬﺎ ﺑﺲ ﺩﻣﻮﻉ
ﻗﻮﻟﻠﻲ ﻳﺎﺑﺎ ﻭ ﺭﻳﺢ ﻗﻠﺒﻲ
ﻗﻮﻟﻠﻲ ﺍﻣﺘﻲ ﺗﺎﻧﻰ ﺭﺟﻮﻉ
ﻣﻌﻠﺶ ﻳﺎﺑﺎ ﺍﺯﻋﺠﺘﻚ ﻑ ﺍﻟﻨﻮﻣﺔ
ﻣﺎ ﻫﻲ ﺑﻨﺘﻚ ﺻﺎﺣﻴﺔ ﻭﻣﻬﻤﻮﻣﺔ
ﺑﺲ ﺍﻟﺤﺎﺟﺔ ﺍﻟﻤﻌﻠﻮﻣﺔ
ﺍﻧﻰ ﺑﺪﻋﻴﻠﻚ ﺗﺘﻬﻨﺎ
ﻋﺎﻳﺶ ﺑﺮﻭﺣﻚ ﺣﻮﺍﻟﻴﻨﺎ
ﻭ ﻣﻜﺎﻧﻚ ﻣﺤﺠﻮﺯ ﻓﻰ ﺍﻟﺠﻨﺔ
# ﻣﻦ _ ﻭﺣﻰ _ ﺣﺮﻓﻰ
ليست هناك تعليقات:
إرسال تعليق