ــــــــــــــــــــــ
لو سمحتي اديني ودنك ،،
عايز اقولك كلمتين ،،
عايز اقولك حِلّي عني ،،
أنتى طالعالي منين ؟،،
ربنا يخلّصني منك !
مش خسارة دَمعتين ،
بس هارتاح باقي عمري ،
كان سنة أو كان سنين ،
هانسى كل جميل ف حبك ،
وامسح الماضي الجزين ،
نفسي أرتاح من عذابك ،
نفسي اروّق حَبّتين ،
بس مش عارف هايبقي ،
الكلام ده ازاي ؟ وفين ؟
،،،،،،،،،،،
مانتي ساكنه جوه قلبي ،
دانتي مالياه للعينين !
حُبي ماعرفته الا بيكي ،
نظرة ، وبسمة وموعدين ،
وقتها لمّا اتواعدنا ،
فاكرة يومها قعدنا فين ؟،
مش هاقولك مانتي عارفة ،
قولنا ايه وقعدنا فين ،،
كان ساعتها الحب جنة ،
كان بيفرشها الحنين ،
،،،،،،،،،،،،،،،،،
مانتي لو تقوليلي مالِك ؟.
إيه جرالك دي اليومين ،
كنتي ريحتيلي قلبي ،
وكان بلاهم كلمتين ،
طِلعو مش من جوه قلبي ،
دول يادوب م الشِفّتين ،
لو حقيقي اني كرهتك ،
بَعدك انتي هاحب مين ؟ ،
مانتي واخده معاكي روحي ،
طب هاجيبلي روح منين ؟،
ـــــــــــــــــــــ
بقلم / علي فرج
علي فرج ( خواطر أدبية )
ليست هناك تعليقات:
إرسال تعليق