حكاية عشق.بقلم الشاعر المبدع/ محمود الدندراوى

حكاية عشق

فاكراني ولا توهت انا وسط الحاجات
حباني ولا حبي اصبح ذكريات
حساني ولا ألف وأرجع من سكات
اوعي يكون كل اللي كان ماضي فات

انا اللي عشت عمري اناديكي
ف حزنك بسهر ليالي اواسيكي
وف فرحك اغني اغانيكي
ولما يزيد البرد نار شوقي تدفيكي
ولما الشمس تسخن افرشلك علي شطوطي

ضميني حتي ولو ضمه
شوفيني حتي بعين واحده
سبيلي حتي ولو صوره
احضنها ف اسوة الغربه

انا اللي سابق شكوتي ياما دموع
محوِّشلك حنّيتي لحضن الرجوع

وحشني صوتك وانتي بتنادي عليه
محفورة لسه الصورة فيه
وانتي وخداني فريحك من اديه
ولما الدنيا تزعلني تقولي حقك عليه

انا الساكن ف حاراتك
وصورتي طوبه ف حطانك
ودمي فصلته من نيلك
ولون عيني سواد طينك
واسمي ندهه ف ادانك
انا النور ف نار شمعك
وحبلك اللي كله حلال
انا حبك وتنهيدك
انا جذر الأصول
وفرعك اللي عمره ما مال
انا شهادة ميلاد فجرك
انا عَشْقك
ودايب فيكي يا بلدي.

‫#‏كلمتين‬ من الاخر#محمود الدندراوي#