.
طب فيها أيه
،،،،،،،،،،،،،،،
،،،،،،،،،،،،،،،،،
طب فيها أيه ؟
حبة ألم
حبة دموع
وشويه رفض
شويه طوع
وشويه نرقص ع السلالم
فى لحظة ضلمه بدون شموع
أيه الجديد ؟
م العمر راح من غير رجوع
ويّا السعاده والأمان
الدم هان
والأخ خان
والضى بطّل ينتشر فى الربوع
آه لما تعرف كلمتك طعم السجون
آه لما تنسى انك فى يوم قلبك حنون
راح تفرق ايه الضلمه من عز النهار ؟
ما هو كله غرقان ف المرار
وإن جيت فى يوم
تنطق بكلمه ولو هزار
الكلمه نار
والصمت نار
والآهه طالعه بتتنفض زى الشرار
يا عيون ساكنها الإنتظار
من كام سنه وهيه ف أنين
شايله هموم الموجوعين
إنطق يا صمت وقول كلام
يمكن يفوق المخدوعين ،،،،،،،
بقلم الشاعر / إبراهيم فهمى المحامى
ليست هناك تعليقات:
إرسال تعليق