فيها أيه // للشاعر المتألق ابراهيم فهمى

فيها ايه لو حبّه نرجع للسكوت ؟
ما هو كله موت
الكلمة موت 
والصمت برضو موت
والحقيقه كل يوم بنشوفها
ألف مرة تموت
والضلمه بتلف البلد 
زى الفتوّه بالنبوت
والغش متدوّب فى الكوبايات
وبنشربه 
هو وشوية آهات
يا دنيا طعمك ليه 
بقى طعم المرار
الظلم متمكّن وعامل جوّه منّا حصار
والفرحه غايبه ومتخبّيّه ورا ضهر الجدار
الكل باع 
والكل خان
حتى الجبان منهم 
بقى يضرب زى العيال
وايه يعنى فاضل مش محال ؟
الحب أصبح غنوة حلوة ورقصتين
والصدق هاجر م البلد معرفش فين
والناس سكارى ف الطريق 
من غير خمور
صور الهزيمه معلّقه فوق الصدور
والكل حوّل خطوته 
نحو القبور 
يا زمان غرور 
ولا مره رحمت خطوتك
ضعف الطيور ،،،،،،،،،،