قصيده احتلالك للشاعر محمد عسل

( إحتلالك)

إحتلال القلب فيك شئ مُخيف..
شئ يخلي الروح تعاني..
مهما كانت قوتك هتبان ضعيف..
لما تعشق قلب تاني..
يعني مثلاً ..
يوم تحس إنك خَفيف..
تبقي طاير زي بُلبُل بالأغاني..
يوم هاتبكي ..
من قساوه كالرصيف..
تبكي أكتر لو حبيبك كان أناني..
يوم هايبقي إنتظارك زي سيف..
تبقي حاطت ليه رقبتك..
وإنت مَجنِي وإنت جاني..
يوم هايبقي الشوق حراره...
تنطق إن الشوق كواني..
يوم هاتعطش للمحبه..
تبقي عاوز بس نظره..
لو دقيقه أو ثواني..
إحتلالك ...
يوم ما هايفاجئك هترفع رايه بيضه..
والأسيره ...
هي روحك للأماني..
والغريبه..
إن قلبك أيوا ينبض..
بس نبضُه لحد تاني..
وإن عينك أيوا شايفه..
بس كل الناس وكونها..
حد تاني...
وإنك إنت هتبقي وسط الناس وساكت..
تبقي عاشق للسكوت..
رغم عشقك للأغاني..
بإختصار..
إحتلالك يوم مايحصل..
إنت يومها حد تاني.

بقلم.. محمد عسل