شـعــر
الشاعره / هند محسن
نــص : #اخر_اشباح_المدينة
_الشوكة كف ناقص لصحبة وبيت
الرعشة قدامك من قبل م يجلدك كرسي
طرابيزة ناب
والاكل رقصة تفاصيل ف جوعك تتشرب
ف الكل يضحك م الهنا
وانت اللي ف عيونك مغترب !!
طفاية سجايرك كفن عورة لطيارة
حبة احلام ونفخهم كدبك ف الهوا
هلاقي الدوا ف فلوس
وهلبس م النجوم توبي
وانام واصحي علي اتفضل جناب البيه
وهشبك بكره ف عيونها واغنيها
هشف ابويا ف ضلوعي
وامي كمان هطوف بيها
ف دعوة خدتها ف يدي
فضلت تعد ع الشجرة لكام عصفور
دون م تطول جناح فيهم !
لسه السرير طاردك
لسه الكوابيس لابساك
لساك يا واحد اخرك تمشي تبقي معاك
فتعود لاخرك اوله
ولسه ضهرك ورا الباب مخنوق
قضبان خايف يفوق
علي حادثة من لقا كداب
كسلحفاة قابلت كل الغياب بغياب
فماتت م الركنة خطاويها !
_لياقة قميصك دي ولا فصل خريف
من بعد موت المطر سيبتها ومشيت !
الغارة جلد بيعافر ما بعد العلة بالمناديل
قرب مثل قالك : الخير ف ارضك تلضمه
يطرح قليله كتير والغربة غلابة
واحنا هنا غلابة واتشحنوا من قوتهم
ع الرف ساكنة تذاكر متكفلة بموتهم
بس الكفيل خزن
اخد العزا بواقي من تراب مسكون
حد الرحم مفاتيح
والرغوة اخر ما اتكتب علي جثة نزلت من يومين
لما الحصي داقها سلم واتكل لله
واسأل عجل الشنط ع اليتم من بعدين !
يا مسافر وحدك وسايبنا
حاسبنا ع القهوة والشخابيط
وشارع فج من نوره عشان مشيناه
وعيون من صوف لو بدلناه بيدفي
م تقولي يا كتفي :
الفجر بيشبع ولا نهاره جعان
الغربة بتجوع ولا البعيد إنسان
سبل كل شئ بينا ف دفنة وفات
وحط ع الحداد ذكري وسابني للدقات
وقلي هستني
من يومها جفني عربيد لسقفه منطوي
_فضة مراية الشوق والرحلة جايبة العار
فاض بينا نتقابل علي مشرحة جزار !!
هند محسن
ليست هناك تعليقات:
إرسال تعليق