انا الوتر اللى مستنى
يفوت قوسك عليه فيقول
و شمس يدوبها بتسمى
و كارهة البعد .. اصله افول
و انا الضحكة اللى مش ناسية
كلام بينا ضحكنا عليه
و كف سلام و نظرة شوق
و شئ جوانا بندفيه
باحبك قلتها ياما
و كنت بابص ف عنيكى
و حسيتها بتحضننى
و بوست ساعتها شفاتيكى
يا وحشانى و انا بيكى
باعيش فيكى اللى فات و الجاى
و قلبى الحى بحروفك
و ف كفوفك بقى نساى
بعدت المرة دى عنك
لكن سيبته ورا ضلوعك
و انا عارفه هيبقى بخير
عشان متهنى ف ربوعك
امانة سلميلى عليه
و تحكيله على شوقك
قولى له اننا عشاق
و فجرى انتى .. و انا شروقك
و انك بنت م الجنة
و رضوان حس ف فتحلك
عشان القى لحياتى حياة
و كونى بحاله مرتاحلك
باشوفك فى البشر بسمة
بتنده لى .. ترد الروح
و اشوفك ف الشجر زهرة
ريحتها بالغرام بتفوح
و نجمة ف السما سارحة
بتكتب لك بحبى جواب
و بتقولك ... مفيش مسافات
بتخلق بعد بين احباب
حبيبتى .. انتى جوايا
بوسع الكون .. حاجات حلوة
و صوت بيرن ف ودانى
و بيسمعنى ١٠٠ غنوة
يمين بالله يا روح قلبى
و ما ليكى عليا يمين
باحبك من هنا لعندك
يا حضنانى بصفا و حنين
ليست هناك تعليقات:
إرسال تعليق