أعذرينى
من ديوان / سيبنى أحلم
للشاعر/ مصطفى فريد
أعذرينى
لو كلامى كان مشوش
أو بحوره بتنكسر
والوزن فيه من غير صور
وبتترسم بين المعانى
حاجات غريبة بتنبدر
على قلب مليان بالألم
يطرح قلق
ويزيد فى صوت الخوف ندم
لما يشوف قدام عنيه
من بين إيديه
أحلامه م الأحزان بتصرخ
جوه غربه بتقتله
وبتسرقه
وسنين ربيعه
اللى رواها بدم قلبه
بتغزله ٠ وبتنحرق
راح يعمل ايه
غير أنه يكتب كلمتين
من دمعه أو من دمه
يمكن تعدله
وتحرره من فوق سطور
مدبوحة من صمت الحنين
متلهفه لعيون حبيبته المخلصه
لما تفوت على كل حرف تخضره
وتعطره
وتكرره بترياق محبه وتحضنه
وتطمنه على بكره لما يوصله
ليست هناك تعليقات:
إرسال تعليق