اقولك ايه
شعر
الشاعره / مريم ذكي
شعر
الشاعره / مريم ذكي
عارفين.. انا نفسي بجد ومش بقدر
بضعف في اقل من الثانية
واستقوي من اللحظة التانية
في قليبي بما يسمي"تناقض"
والكل مصمم يتعارض مع اهدافي
عندك مثلا كل الاوزان
والقافية وكل بيوت الشعر
حالفين مايمروا في تفكيري
يمكن من شهر وللتاني
بكتبلي في حرف يمثلني
وبيوصف اوجاعي بدقة
ومازلت بعيشها ومتفائلة
بضحك للدنيا تكشرلي
ومصره ان في يوم تضحكلي
اللامبالاة بقا دة حكاية..
بيبان من تكرار الصدمة
وتقابلة بصفتك شخص كفيف
ومابيهموش فين الضلمة
كلها واحد بالنسبة له..
وبقيت حرفيا شخص كفيف
اللامبالاه اتمكن منه
واوحاله بكل جميل عادي
اما اللي اساسا مش عادي
أمي اللي اذاها كتير وجعي
جت تصرخ وسط الليل "بنتي"
ايه مالك وازاي احوالك؟
ولية كل اما اقول اشكي
الاقي الدمعة بترغرغ؟
ولية لونك يبان شاحب؟
ولية مانتيش كدة صريحة؟
يابنتي الفضفضة مريحة
انا امك هاشيل همك
واحطة في قلبي انا بدالك
ارد وكلي صوت مكتوم
يا امي صابرة والله
وراضية بكل شئ مكتوب
ماتتخضيش ولا تخافي
دة كله كام وجع مكبوت
مسيري يومين وهاتعافي
ماتتضايقيش عشان بنتك
تمللي قوية متشافة
لكني ضعيفة من جوه
بخاف اشكيلك العلة
تزيد العلة جواكي
يهون كل الوجع فيا
وكل الدنيا إلاكي
اقولك اية واعيد عنهم؟!
وهو يا أمي كان منهم
رفضت الكل و حبيتة
وحطيته علي جناحي
عشان مايوقعش
وبعد دة كله ليه مانفعش؟!
أكون طائر مباحله الطير في أرض الله
رفضني أكونله ليه مآواه؟!
حبسني في غيتة لكن
قطعلي في ريشي ومنعني من اني أطير
بياكلوا في عمري بمزاجهم
ولما بيشبعوا بيمشوا
وحتي الاقربين غشوا
اسفه لان البشر بيعروا مايغطوش
جعلوا الغرام خرطوش سايب اثر في الجسم
الاسم دار للامن والفعل بيشرد
جعلونا دون ماوي بيسيبوا علي سهوى
واحنا اللي بنعاني
ووجعنا اقوي كتير من وصفة في الاشعار
سابق عاصفتة هدوء ناتج حدوثة دمار
كل اللي كان مختار اصبح مافيهش نصيب
عمر اختياري ماكان في يوم هايصيب
دة لان كل الناس غاوية ان هي تغيب
تفاصيل حياه البعض اصبح شريط بيسف
كل اما ينوي يخف بينتكس تاني
كل اما تسال حد مين ابتدي بالبعد بيقول فلان"جاني"
والله ما أذيتة معقولة يعني كلهم مظاليم
مين فينا كمل عمرة شخص سليم
كونك بتنكر فانت تبقا لئيم
ومافيش مثالي مابيننا بالتقييم
الكل يحمل صفة عايشة بجسد وروحين
لو واحدة يوم تنجرح بترد عنها التانية بالتنشين
ليست هناك تعليقات:
إرسال تعليق