شعر
نص الوحده
الشاعر /احمد رمضان
الوحدة دار أيتام بتجمعنا
الشمس طالعة بس دون معني
في ألف حاجة قاصدة توجعنا
إضرب ف ألف وحدد المقياس
بيتك هجرتوا بس ساكن فيك
حزنك قتلتوا لكنه عاش يرديك
محتاج محبة وقولي مين يديك
وإنت الرصيف ف عيون جميع الناس
قلبك هوائي والهوا غلاب
طبعك فدائي لو فدا الأحباب
كل اللي دخلوا ما خبطوش ع الباب
وخانوك وقلبك ظنهم حراس
حلمك دفنته بين سجاير فرط
هيعيش ويحيا للي جاب الكارت
ولا خيروك ولا حتي كنت إخترت
ووهبت روحك فصلوها مداس
شلة صحابك بعضهم تايهين
في جزء زيك مكسورين مساكين
والباقي هجروا يبقي فاضل مين
أربع حيطان والقفل والترباس
أهلك شافوك زي القتيل بتنام
واكل وشارب يبقي كله تمام
وإنت اللي ميت منتظر إعدام
في فرق بين الرؤية والإحساس
هي إستقرت جوا حضن غريب
ف عنيها راعي و ف عنيك الديب
والحجة كات بالزيف قسم ونصيب
والوعد كان م المية للغطاس
وطنك سوادة ف جبهة الملكوت
أعظم ما فيه المدعي الهلفوت
إهرب ف مركب بيراودها الموت
" همت به " وماهمهاش إخلاص
#أحمد_رمضاان
#نص_"الوحده"
ليست هناك تعليقات:
إرسال تعليق