غضبان / عامية
،،،،،،،،،،،،،،،،،،،
جوّايا حاجه كتير شغلاني
شاغله مشاعري وشاغله كياني
بس منيش عارف أمسكها
ولا خيط منها عرف عنواني
حاسس إنّي وحيد ف الزحمة
مش لاقي عطف ولا لاقي رحمه
جوّه قلوب الناس أنانية
ساكنه وساكنه معاها أسيّه
شايف كل الكون حواليا
سيرك وفيه الناس مش هيّه
فيه الرقص
وفيه الخبص
وفيه الحبس
وفيه حراميه
فيه سارقين اللقمه الجافه
وفيه حاسدين الرجل الحافيه
وفيه لا مؤاخذه
داروا الشمس
وداروا البدر
وجابوا الكافْيَه
آه يا عيون مليانه هموم
فيكِ الورد صبح مذموم
حتى الخير إغتصبوا بكارته
وسرقوا مكانته
وبقى معدوم
يللي بتلْهوا الناس بالكلمه
وبتحطّوهم جوّه الضلمه
فاكرين إن الضلمه دي نعمه !!
بكره هيصرخ صوت مكتوم
جوّه وريدي كلام وكلام
نفسي بقوة يشق ظلام
يفرد نور الوعي سحابه
تطرح كل الأرض وئام
نفسي ألاقي الطير ف بلادي
عايش حر بدون قنّاص
نفسي تاريخ ماضي أجدادي
من غير كذب يكون لي أساس
نفسي الزرع الأخضر يرجع
نفسي ف مكن المصنع يبدع
نفسي عقول النايم تسمع
وتسترجع خيرات الوادي
بس كلامي يادوب على قدّي
واولاد جنسي دايما ضدّي
ولا حدش بيفكّر فيهم
إن إيديهم تبقى ف يدّي
فكّر تزرع مرّه فسيله
أو تُبدع في كتابة سيرة
أو تمنع قرصان عن بيتك
يسرق كدّك إنتَ وكدّي ،،،،،
بقلمي / إبراهيم فهمي المحامي
9/1/2019
ليست هناك تعليقات:
إرسال تعليق