الولد الشقى حلقه رقم 7
★★★★★★★★★
إلى الاحباب بدون استثنى السلام عليكم اهل الخبر والبركه
قبل مندخل فى موضوعات الحلقه لابد أن أنوه عن شنطة التلميذ ايام زمان
عادة كانت الشنطه من نفس قماشة المرسله أو قطعه من قماش دمووور وده أقل قيمه من البفته كان ارخص قماش وممكن بفته ولكن أنه ابيض بتبان فى الوساخه بسرعه وفيه ناس بتجيب كيس السكر بتاع زمان كان قماش ومرسوم عليه هلال وتلات نجوم وفيه ناس كانت تفصل كيس السماد بتاع الزرع أو الكيماوى تفصله شنطه زى الشنطه الجلد بس ماكنش بيعيش كتير علشان يده بتتقطع بسرعه فبالتالى كلها بتبوظ وطبعا كل الشنط لها يد طويله ويلبسها يعديها من رقبته وتكون تحت باطه ومشوفتها الا وهى مدهننه من السندوتشات الطبيخ اللى كانت بتطفح على الكتب والكراريس دى طبعا الغاليبيه العظمى الا بعض الاشخاص قلنا ابوهم موظف زى عم الصول يونس أو يحى كان بيجيب لعياله شنطه جلد ببزيم يعنى لها قفلين زى الصندل كده ولازم تعرف أنه مش كل سنه هيجيبله شنطه جلد لاء دى ممكن تكون صلاحيتها المرحله الابتدائيه كلها يخلص السنه الدراسيه لو الشنطه فيها قطع يوديها للجزماتى يحيطها ويلمعها وتتشال للسنه الجايه ومش كل سنه شنطه زى اليومين دول حتى الجزم كانت برضو أغلبها كوتشات من با نا ودى كانت اشهر احذيه أيامها وكان لونين ابيض وطوبى اول واحد اشتريته كان ب ١٦قرش من عند كوشك بتاع التموين وكانت مش فى علبه زى الوقت لاء دى كانت زى ورقة اللحمه بس سميكه شويه المهم هى بتشتريها مره واحده فى السنه انت وحظك اشتريتها على دخول المدارس تبقى مش هتشترى على العيد اشتريتها على العيد هتدخل بيها المدرسه حتى لو مقطوعه بس الجميل لما كنا تشتريها ليلة العيد كنت تبيتها فى حضنك هى ولبس العيد علشان تصحى العيد الصبح تلبسهم وكان لها ريحه ممتعه تنام على عبيرها
انا طلبت من المرحوم ابويا يجيبلى جزمه جلد على العيد ربنا يرحمه ويحسن إليه فعلا راح اشترى جزمه جلد مابصش كويس عليها طلعت يمين وشمال عادى بس الموديل هو هو ولكن على اتنين نعل نعل مدور ونعل مدبب زى الصوره المرفقه بالمنشور ولبستها ورحت بيها المدرسه وفضلت على رجلى لما دأبت..
ولبس العيد كان جلابيه جديده تفصلها فى العيد الصغير وتقعد للعيد الكبير والواد الحنت يفصل بيچامه كستور ويسلام لما يجيب زرايرها على ناحيه والغريب أننا كنا بنتفسح ونروح جنينة الحيوانات بالجلابيه والبيچامه وعادى ماهو الغاليبيه كده اقولكم على سر دخلنا جزيرة الشاى فى يوم عيد فى حديقة الحيوان وقعدنا على الترابيزه والمرحوم صديقى سقف بايده الجرسون شكله مش مستنضفنا فصديقى المرحوم التانى رحمة الله عليهم راح مسقف جامد ليه محدش معبرنا ليه المهم حالنا الجرسون تطلبوا ايه يا بهوات قولناله هى مش دى جزيرة الشاى عاوزين شاى فكالنا الشاى كومبليت ب ٣٢قرش يعنى تمن اتنين كوتش با تا. قولناله يعنى ايه كومبليت قال معاه كيك بس السعر غالى علينا ما هو كانت تحويشة العيد كلها ٥٣ قرش بالظبط مش معقوله هضيعهم فى شربة شاى دا انا لسه ورايا كشرى وسينما الفنتازيو ومواصلات وتأجير عجل وممكن اتوبيس نهرى يعنى لسه بدرى لما نخلص التحويشه اضيعهم فى شربة شاى احنا سمعنا السعر كنا حطين رجل على رجل روحنا منزلين رجلينا وطلعنا مش من الباب اه والله من السلك من السور يا حضرة ماهو كان مبلغ برضو
حتى الفسحه كانت دمها خفيف والدنيا بسيطه ربنا يريح بالنا وبالكم قادر يا كريم...
والى منعطف تاريخى تانى ونقول على أسرار الجيل الذهبى
دمتم فى رعاية الله وحفظه والسلام عليكم ورحمة الله وبركاته
ليست هناك تعليقات:
إرسال تعليق