عمر الصفيح ما يكون دهب
صفحة من ذكريات الشاعر : محمد ضباشه
زعلتنى بالكلام
قلت أنام
وأنا قلبى باكى من التعب
مشيت خطاوى منهكه
وأنا على السرير بركان لهب
وعنية باصة على الحيطان
والعقل تايه فى المكان
وجملة واحده على اللسان
يا حبيبتى لية ؟
عمر الصفيح ما يكون دهب
ليه العقل منك يختفى
والقلب منى يترهب
ولا القلوب أتغيرت
ولا عيونك تاهت منها سكتى
يا دنيتى
دوسى عليا وارفعيهم
اسقينى كاس الذل
واوعى بردوا تزعليهم
دول حته منى
وحته روحى ساكنه فيها
ولما كانت ....
كنت كلى بين أيديها
وفى عنيها
أنا كنت طاير على السحاب
وحبة ضباب
توهونى وتوهوها
لخبطونى ولخبطوها
عذبونى وعذبوها
وخلوا الشمس تتوه مننا لسنين
حزن وأنين
واتفرقوا القلبين
والكل منا أشتكى
حبة بكا يا أهل الضمير
حبة أيمان يا اهل الأيمان
ما هو كله خير
واقعد واقول يمكن يا واد
رب العباد عاوز كدا
وفسدوا ما بينكم الكلاب
من دا ودا
علشان نقول هما السبب
وكانوا اللهب
وخلوها ما بينا حريقه
وفى ودنى بسمع كلمتين
يمكن بريئة
أوعى تبان زى اللى خان
زى اللى كان واطى وخسيس
يا دمعى ليه جوايا
قتلنى وعايش حبيس
لحد أمتى مختفى
يا دنيا بيا ألطفى
ماكفاية دايما بشوف منك قساوه
حبة حلاوه على اللسان
حبة طراوه على المكان
حبة سكوووووووت
لحسن هموت
من كتر ما الكدب باين على الوشوش
والصدق منا أختفى ويا الجفا
وحبة رتوش
ورجعنا تانى والزمن غير الزمن
ورجعنا تانى والعفن نفس العفن
نفس الكلاب
نفسى الضباب
وانا لسا طاير على السحاب
شايف فى عنيها حبة أمل
يقولوا للشمس تطلع تبتسم
وللصورة لازم تترسم
وتبقى معايا نصد ريح
وفى النهاية اقول لها
يا حبيبتى لازم تعرفى
عمر الدهب ما يكون صفيح
ولا اللسان الحلو
ما يقولوا عليه قبيح
ليست هناك تعليقات:
إرسال تعليق