جزء من قصيدة / زمن الديابه
من ديوان/ ولسه بحلم بفجر
للشاعر/ مصطفى فريد
برغم المسافة وطول البعاد
ورغم اختلاف اللون والعقيدة
باحس إنى منك
وباشعر بأنى حزين لما أسكت
وأغمض عنيه
وادفن دماغى فى الرماد
وشايفك ياصاحبى بتنباع رخيص
فى سوق العبيد
نخاسك اخوك
بيتاجر فى همك وقوت الولاد
بيشرب فى دمك ولحمك مزاد
مباح للى يدفع فى لحم الأسير
جنيه او دولار
وارضك عمار
ولسه انت داير تمد الإيدين
وخيرك لغيرك
وعرق الجبين
بيصرخ بشدة وينده عليك
مادمت انت عايش فى عصر الديابه
تذأب ياصاحبى
وفوق من منامك
قوم اركب حصانك
ودوس فوق خصامك
وعض بسنانك فى كل خلافاتك
وغير مكانك مابين الجيران
ما عدش فى زماننا مكان للصغار
زماننا ياصاحبى
زمان المصالح وعصر الكبار
ليست هناك تعليقات:
إرسال تعليق