مركبة تايهه
،،،،،،،،،،،،،،،
سفينة نوح وأنا فيها
بدوّر عن صديق صافي
محدّش شوفته في الزحمة
غير مقتول بيتعافي
سألته فين واخدنا الموج
جاوبني رد مش وافي
وقال لي أيه يفيد الرد
ولسّه الصف متجافي
كلامه فيه مرارة لوم
وجوّانا العطب طافي
بقينا خليط بيتنافر
وأحلى ما فينا بيسافر
بقينا وكلمة م الآخر
نقط لمعنى مش كافي
فقدنا لمّة الجدعان
وبدّلنا الوهن خذلان
ننام ونقوم على الحرمان
ندوّر عن أمان ما في
بقينا وشوش ما نعرفهاش
بنستنّى أمل ولا جاش
وضاع العمر منّا بلاش
وحالنا بات ماهوش خافي
ولمّا أراجع الفكرة
وأشوف الصورة لو بكرة
ألاقي احنا ماهوش احنا
وحتى المركبة تايهه
ماهيش هيه سفينة نوح
مفيش فيها طهارة نوح
ولا بينّا النبي يونس
يسبّح جوّه بطن الحوت
أنا وأنتَ وكل الناس
بقينا نفوس وساكنة تابوت
بقلمي/ إبراهيم فهمي المحامي
13/11/2018
ليست هناك تعليقات:
إرسال تعليق