ورقة منسية
×××××××××
ليه عاوزين تحاكمونى؟
وانا نسيتكم
متنسونى
طريقكم غير م انا ماشى
ولا حاقد
ولا واشى
ولا ف دماغى أرجع يوم
لنفس السّكة من تانى
ليه رابطين مواجعكم
بطعم الّلقمة قُدّامى ؟
ليه عاوزين أتابعكم
وأكتب نعى أيامى؟
طريقنا خلاص بقى طريقين
شوفوا انتوا طريقكوا يبقى منين ؟
عشان أمشى طريق تانى
سيبونى خلاص لأحزانى
يفيدكم أيه أكون منكم ؟
وأنا بينكم بعيش فانى
تتوه الخطوه لو بينكم
تضيع الراحه لو منكم
أنا ملّيت أنازلكم
سيبونى الهم ينسانى
سنين ضاعت وأنا فيها
وحتى نسيت أساميها
وشوفت الدنيا م الآخر
خطوة وقلت أعدّيها
يا دوب ألحق نسايمها
تداعب ورقه منسيّه
لسّه خريفها مش فيها
بتحلم تتولد تانى
تشوف فرحه فى وجدانى
تخلّى ربيعها ده شجره
بتطرح جوّه شريانى
واعيش الحلم من تانى ,,,,
بقلم / إبراهيم فهمى المحامى
1/2/2015
ليست هناك تعليقات:
إرسال تعليق