قصيده عشقتك يابلح امهات للشاعر ابراهيم ضوه

كل أما أشوفك أعشقك أكثر
وأغزل في وصفك غنوتين وأكثر
رحت لطبيب الهوا يوصف دوا لحالي 
قال لي علاجك تذوب في الحبيب أكثر ..

القصيدة بعنوان / عشقتك عشقتك يا بلح أمهات
عشقتك ذنب في الخلوات
ودعوة بحرقة في الصلوات ..
عشقتك عمر عدَّي وفات ..
وسيل جارف من الكرامات
من الفتوحات ..
علي الآهات .. علي الأنات ..
عشقت نسيجك الواحد
ما يقبلشي في يوم قسمة
عشقتك وانتي مبتسمة
رقيقة وصابحة كالنسمة
ومكتوبة علي جبيني ..
وحبك في الحشا قسمة ..
عشقتك لمة الأصحاب
ودقة باب في عصرية
ونسمة في ساعة بدرية
وحبة فول وطعمية
عشقتك وانتي ملالية ..
ومطفية ..
عشقتك مؤمنة بالله
عشقتك لما أقول الآه
ألاقي كثير حواليه ..
عشقتك عارفة حق الغير
لكن حقي مانيش طايله
عشقتك وردتين وضمير
وحرماني السرور كله ..
عشقتك جامعة وشهادة
وماجستير
وخدت إفادة في إفادة
بإني بحب بزيادة
وأتمني تكوني بخير ..
عشقتك في الوجود آيه
عشقتك طير
وقمرايه وضلايه
وحبة ميه لو عكره
إذا من نيلك المرمر
تكون سكر ..
أنا راضي ويا رب تدوم !!
ما يقطعاش حدادي وبوم
ونصحي في يوم
ما نلقي فيه ولا قطرة ..!!
عشقتك وانتي منتصرة
ومنكسرة ..
وساعة العسرة واليسرة ..
عشقتك في جميع الأوقات
عشقتك وحدي أنا بالذات
ومن دون البلاد إنتي
يا مصر هواكي جوه الذات
يا مصر هواكي جوه الذات
يا مصر هواكي جوه الذات

شعر / إبراهيم ضوه