سر المفتاح...بقلم الشاعرة المتألقة / إيزيس غانم

سر المفتاح....

...........................
لما إستدعوك....لبيّت الدعوه...
طبطبت عليهم...ومسحت الدمعه..
وفحتّ السما بإيديك..
هديت الضلمه..وقدت الشمعه..!!
ودبحت أفاعى الكهان...
وحاربت يا مصرى الشيطان ...
وقضيت ع اللعنه ...وع الملعون...
وزرعت الحريه يا مصرى...
بالحب ف كل قلوب ..وعيون..
وإتوضيت من ترعة مصر وقمت تصلى ..
صلى وراك مظلوم ..وحزين..
صلى الأب ..وصلى العم...
صلوا جميع المصريين...
لكن لسه الحيّه هناك...
ولسه الساحر ....موجود...!!
ف إرمى عصاتك..تبلع ..
سحر الساحر والحيه..
وتلم يا مصرى جميع الدود...!!!
مصر يا مصرى محتاجه إسود..

محتاجه لقائد يعرف إمتى
يطبطب ...إمتى يسود.....
غنمات الراعى الطيب...
محتاجه لراعى يكون ...طيب..
ف إقسم تفاحة مصر ..
ووزعها بالعدل الطيب..
ع اللى ماداقش التفاح...
ع اللى البكا كان لقمة يومه...
ع اللى همومه ..
كات صبار من غير مفتاح...!!!
ويشاء الرب...تكون الاب...
وتكون إنت ...سر المفتاح...!!

.....................................
من ديوان\\ التشكيل من خلال إمرأه..

إيزيس غانم ...