قصيده سامحينى للشاعر محمد عسل

(سامحيني)

كفايه دموع منيش قادر.....
دموع اللوم علي خدودك بتكويني...
وفرحة قلبي بتهاجر....
وعينك لو ف يوم تِحزن تموت عيني...
دا حُزنك ليا هم ونار بتحرقني..
وتِقتلني وأنا عايش وتمحيني..
عشان خاطر مشاعر قلبي سامحيني..
وقولي الهجر كان تهديد..
وقولي إنك عِشقتيني..
عشان الدمع والتنهيد..
بيسجن قلبي يإذيني..
وأنا حالف خلاص عُمري ماهبعد يوم..
وهبقي معاكي طول العُمر وسنيني..
ومش هاسهر ليالي كتير بعيد عنك..
هاجيب قلبي وروح الروح وتكويني..
وأكون جمبك عشان تِرضِي..
عشان حُبك بيملكني ويحييني..
عشان خاطر ليالي الحب سامحيني..
خلاص قلبي مهوش قادر يشوف دمعك..
ولوم الدمع قاتلني ...
مُوقَّف سير شراييني..
وأنا والله مش راضي عن الأحزان..
ولا عُمر القساوه ف يوم بترضيني..
لكن مافي عيوب خاليه من الإنسان..
وأنا عِيبي بغيب عنك يانور عيني..
ظروف الدنيا وخداني وضيق الحال..
ووقت البُعد عُمره ما كان بيرضيني..
وكنت بقول ف بُعدي يارب إحفظها..
وكان شاهد علي حُبي دموع عيني..
ويشهد ربي إن حروفي بكتبها..
لكن دمعة عنيكي تزيل دواويني..
ودي إيدك هاتيها ف إيدي أكسبها...
وخليها تلامس خدي وجبيني..
ودي بوسه كمان مني علي جبينك...
وضمة شوق لقلب وحضن يشفيني..
ودا عُمري وحالف إنه عاش ليكي..
ودي روحي بتتوسل تسامحيني..
ف سامحيني.

بقلم...محمد عسل