حكاوي زمان ... بقلم الكاتب الساخر / خالد صحصاح أبوصالح

لما كنت صغير فالسن يعني من حوالي 40 سنه كدا فيه اتنين من بلدنا اتخانقوا مع بعض علشان ابن ده مسك ف ابن ده والواد والواد دوكهه قطعوا هدوم بعض كانت ام ولد منهم بتجيب طلب ومروحه وشافت الخناقه فراحت بعده الولدين عن بعض وقالت لابن الجيران روح وخدت ابنها وروحت وكانت واحده ست واقفه من بعيد بتشاهد الخناقه ، فراحت لام الولد التاني وقالت لها اسكتي مش فلانه سلطت ابنها يقطع هدوم ابنك ويضربه ،فخدت بعضها وراحت لجارتها ومسكت فيها والست دي تقول للست دي حصل وحصل والست دي تروح للست دي وتقولها حصل وحصل والراجل ده يقول للراجل ده حصل وحصل ، وهكذا لمدة شهرين والامور وصلت لطريق مسدود واتدخل فلان وعلان من كبار اهل البلد وفلان وفلان من البلاد المجاوره والاقارب ومحدش عرف يصلح بينهم ..وفي يوم من الايام جت ستي وقالت لي ياواد ياخالد تعالى اتسند عليك وتوديني عند بيت خلتك فلانه ، فقولت لها ماشي ياستي ، بس هاتروحي تعملي ايه عندها فقالت لي هاصلح بينها وبين بيت خالتك فلانه ، فبصيت لها كدا من فوق لتحت وقولت لها ، يعني ياستي كبار البلد والبلاد المجاوره ماعرفوش يصلحوهم ،ووووانتي اللي هاتصلحيهم ، فقالت بطل لماضه ياواد وهاتشوف ، بيني وبينكم ان قولت ما ازعلهاش واروح معاها وعلشان ماتغضبش مني ، وفعلاً روحنا بيت خالتي فلانه الاولي ، وقعدنا وعملت لنا الشاي على الكانون واحنا قاعدين بنشرب الشاي ، راحت ستي قالت لها تصدقي ان فلانه دي بتحبك وتعزك وحكت لي عنك حاجات كتير حلوه انتي وهيه كنتم بتعملوها سوا ومش انتي عملتي لها كذا وكذا فقالت لها اه وفاكره لما كانت والدتك ووالدتها كانوا بيعملوا كذا فقالت لها ااااه ، وقالت عرفتي بقى هيه بتحبك قد ايه ، وتاني يوم روحنا لخالتي فلاني التانيه وقالت لها نفس الكلام ، وسبحان الله ، ستي اللي بتتعكز على العصايه ومش قادره تصلب طولها ، ستي اللي مبتشوفش قدامها الا طشاش ، ستي اللي مااتعلمتش ولا درست ، تحل المشكله الكبيره دي اللي ماقدرش عليها عتاولة وكبار البلد ، وتعلمت منها ان الكلمه الطيبه صدقه ، وبالكلمه الطيبه ممكن تعمل المستحيل وتيقنت من وقتها ان لم تقدر علي قول كلمة طيبه ، كلمة خير فلتصمت احسن وافضل
 (الف رحمه ونور عليكي ياستي)