ــــــــــــــــــــــــــ
همّي يامه وقولي مالك ،
متشيليش في القلب همّ .
فضفضي عاللي جرالك ،
عزتك عندي الأهمّ .
عارف انك مستحيه ،
تجرحي حد ف عيالك ،
حتى لو بالغدر همّ .
بس دولا مش عيالك ،
دول نكد معجون بغمّ .
دولا روح مش متقيّه ،
دول نفوس قاسيه وغبيه ،
دولا همّ وفجأه جالك ،
ما تشيليلهم اي همّ .
دولا جرثومة مرض ،
دولا في نفوسهم غرض ،
دولا في حياتك عَرَض ،
راح يزول بأدين رجالك .
دمهم مش دم طاهر ،
دم فاسد فجأه طالك ،
دم رايح للمهالك ،
مهما فاض أو مهما عمّ
عمره ما يخيّب أمالك ،
أو يشين زهرة جمالك ،
قومي دانتي أغلى أم .
قومي وافتخري بعيالك ،
اللي مش هيسيبوا تارك ،
واللي حالفين يهدوهالك ،
نور وعزه وخير يعُم .
قومي وانسي اللي جرالك ،
قومي يامّه يا أغلى أم
مهما شوفتي ومهما نالك ،
عزتك هيّا الأهم ....
ــــــــــــــــــــــــــ
علي فرج
الجمعة 6 فبرابر 2014م
ليست هناك تعليقات:
إرسال تعليق