ـــــــــــــــــــــــــــــــــــــ
لو تعرفى أنا قد أيه
قلبى بيصرخ م الألم
وإن الحياه ما بقت حياه
يوم ما منّك إنظلم
بعتى الوعود
إزاى أعود ؟؟؟
وأنا قلبى من غيرك عدم
راجعى اللى فات
والذكريات
شوفى مين بيبْنى
ومين هدم ؟
فاكره الشوارع والبيوت
فاكره الكلام من غير حدود
دلوقت أصبح فيه جدار
والصمت حوّلنا ف حصار
مين ابْتدى وطيّر طيور الحب
من فوق الشجر ؟
مين منّا بايديه الجريئه
خنق القمر ؟
يوم بعد يوم
بتحسّسينى
إنّك نويتى ع السفر
بلقى الأمان هاجر عيونك
والحياه صبحت سهر
لو لسّه باقيه ع اللى فات
أرسلى لى ولو خبر
حاولى
تشوفى اللى اشترى
وبلاش تشدّى فى الوتر ،،،،،
بقلم الشاعر / إبراهيم فهمى المحامى
ليست هناك تعليقات:
إرسال تعليق