......
يا غربتى وسط أهلى و ناسى
يا غربتى حتى فى إحساسى
تيجى تفكره يعملك ناسى
تيجى تذكره يطلعلك قاسى
و انت أصلًا احتياطى و غيرك أساسى
يا غربتى و ما عدت على شيئ راسى
حتى فى الحب بتتبدل الكراسى
يا غربتى يا وجع قلبى و راسى
حتى فى الحب لعبة الكراسى
يا غربة وخدانى على فين
و أنا عايش وحدانى فى عام ألفين
يا غربة وخدانى على فين
ع التربة و لا على أبو أنفين
يشمك و يشم غيرك و الناس صفين
يا غربتى و ما عاد الناس صنفين
أصناف جديدة ظهرت فى السوق
تشوفها بس و محرم عليك تدوق
و أصناف تانية تحبك وقت ما تروق
و ان غضبت تلاقى نفسك مدلوق
و أصناف مملحة مثل فسيخ دسوق
وشوشها مكلحة و دايمًا عايزه تسوق
و ناس مشلحة م الفقر و الغم المدعوق
و أصناف و أصناف و أصناف
و ما عاد من المسلمين أحناف
بس فرق و أحزاب و أحلاف
بس فرق و أحزاب و خلاف
و مش عايزنا نخاف
يا غربة خدينى و خبينى تحت اللحاف
أصل أنا من الناس بخاف
.....................................
محمد أبو المعاطى محمد
ليست هناك تعليقات:
إرسال تعليق