قصيده اسالى للشاعر ابو عمار المصرى

إ ســـــأ لـــــــــى

********

الجنة أبعد ما يكون 
عن قلب متعـَـوِّد يخون
ما يخشهاش زيف القلوب
ما يخشهاش غش العيون
وانت يا صاحبة الجلالة المتعـِبة
كنتى زمان فى القلب نبضة
كنتى الطفولة والصبا
وانا كنت واقف
بين حدود العمر ليكى
أسقيكى من شهد الغرام
لما انت كنتى الطيبة
لما انت كنتى
الورد طارح ع الخدود
من غير دهان
من غير رتوش
من غير سؤال ما بحبهوش
وكلام حروفة مكعبـِلة
أحاسيس وكانت مهزلة
كل الغرام كان فوق شفايفك
مصمصة
كانت عنيكى تقول حكاوى مخلصة
والقلب مقفول ع الخداع
مستنى لحظة يقول وداع
والحب ضاع
ما بين وهم العيون
وبين كتر الظنون
صارحى حقيقتك فى المراية
واسألى
ان كنتى فعلا قلب داب
أو كنتى قلب رخام حجر
إن كنتى عشتى الحب روح
أو كان عليكى قضا وقدر
إسألى ...
إن كنتى ناوية ترجعى
أو كنتى ناوية تكملى
مع إنى عارف م البداية انها
هتكون نهاية مؤسفة
زى المشاعر
لما تبقى مزيفة
عيشى بطريقتك واعشقى
ألوان برشتك ترسميها
خطوات طريقك حدديها
وامسكى السكة
لآخر خطوة فيها
واتمنى ...لو يوم توصلى
أبقى اسألى
............
بــقـــلـــــم ا لـــشــــــا عــــــــــر
أ بــــو عــــمـــــــا ر ا لــمـــصــــــــــرى