اصحي يا نايم
******
اصحي يا نايم وحدّ ربّك
صلّي وسبّح للرحمان
رمضان شهر عباده وصوم
طهر قلبك بالقرآن
تلقي ف قلبك دايما لوم
رافض دايما للشيطان
اصحي يا نايم فات كم يوم
اوعي يفوتك ف الغفران
يلا يا نايم قوم واتسحر
قوم ع المدفع والقرآن
بكره الصبح هيجي ويطلع
بص بعينك ع الغلبان
عود نفسك فعل الصدقه
طهر مالك بالاحسان
أسأل نفسك مره يا صايم
إيه الحكمه وليه رمضان
علشان تعرف معني الجوع
تسقي الميه للعطشان
قلبك يبكي لأي دموع
تفضل ليل ونهار حيران
تعرف إن المال لله
وان طموحك كان غلطان
وانك يوم الحشر لوحدك
فين المنصب والسلطان
فين المال اللي انت جمعته
فين المصنع والاطيان
فين الدنيا وفين شهواتك
ياللي ضميرك كان قحطان
فاكر يعني تاني هترجع
وإن المال هيكون منصان
لأ يا عمي المال هيروح
إلاّ صيامك والقرآن
هو انيسك جوه القبر
واللي هياخدك بالاحضان
اصحي يا نانيم وحدّ ربّك
صلّي وسبح للرحمان
*********
بقلم / طه إبراهيم
ليست هناك تعليقات:
إرسال تعليق