قصيدة أفاعى السحر للشاعرة / إيزيس غانم

قصيدة \\ أفاعى السحر ...

من ديوانى الأول \\ هلع الخوف ..

كلماتى \\ إيزيس غانم ..

___________________________

لمّا إبتديتك..إبتديت الصعب ..

حاولت أهدّم فيك حصونك..

وأغرس ف عقلك سكينتى ..

فى سن سكينك..

علشان أجنك..واصلبك ع الدرب..!!

لقيت سهام كيوبيد ف إيدك ..

.......بتحاصرنى......

وتترشق ف القلب ..!

وبقيت أسيرتك ..وف سفينتك..

حسيت بحبك أحلى حب ..

سلمت نفسى للقيود..

ورضيت بحبك..

هوه إنت مين؟؟ هوه إنت إيه..؟

حلم إبتدا ونهايتى فيه ..؟

جيتلك عشان أهدم حصونك..

وأهزم غرورك..

وأرفع ..فوق جبالك العاليه

رايات نصرى ..!!

لقيت أفاعى السحر ف عيونك .

هاروتيه..ماروتيه .بابيليه..

هزمت حصانى ..وحطّمت قصرى ..!

سلمتلك..ورفعت رايتى بالهزيمه..

ضمتنى حب..ضمتنى قلب ..

حسستنى وانا بين إيديك

إنى أجمل إمرأه ..وإنى العظيمه ..

وإن النسا من قبلى

أو من بعدى عندك ..

مالهمش قيمه ..مالهمش قيمه..!!