من كم سنه سافر بعيد للشاعر //محمد عسل

من كام سنه سافر بعيد.. 
بمواصله طارت ف الهوا.. 
فاتت سنين عايش وحيد..
بيداوي عُمره ال انكوي..
بعد السنين ...
فجأه إنتوي..
ينزل يشوف المحتوي..
أول ما عاد شاف الزحام..
زانق حقوق المحتوي..
شاف المريض لساه مريض..
تايه يدَّور ع الدوا..
شاف الطبيب لساه عريض...
وضميرُه راسه كات ورا...
شاف القهاوي فيها صوت عالي وكتير...
بيشجعوا ويولعوا تبغ بضمير..
والمحتوي صدره إنكوي..
شاف الفقير لساه فقير...
طول عمره دون المستوي...
شاف الوزير لساه وزير..
طول عمره فوق المستوي...
والمحتوي...
واقف طابور...
يخلص طابور يبدأ طابور..
طول الحياه لما إنشوي...
قابل غفير إبن الغفير...
عايش سراب وسط الهوا...
قابل سفير إبن السفير...
عايش يدوس ع المحتوي...
قال يبتدي ينسي اللي فات..
ويروح يزور صاحب زمان..
صاحب سنين فيها إفترا...
ف لقاه مقطَّع توب حياة الذكريات..
قطَّع معاه توب الحنين والأمنيات..
علشان يغطوا المحتوي.