مش مفهوم بقلم الشاعر محمد على النقلى

مش مفهوم .. !!

فى شئ مش مفهوم
إزاى أكون محروم
ومطلوب إن أنا أدي
وهمومي كده بالكوم ؟!

أصحى وأقوم من نومي
علشان أصارع يومي
وأرجع أبات مهزوم

بامشي كعابي يوماتي
ماعييش حق مواصلاتي
وحالي على طول معدوم

طب إزاى أقدرعلى شغلي
وامشي طوالي ودوغري
وماامدش إيدي ف يوم

لو أعيا مش هالقى دوايا
وقهري مكبوت جوايا
ولا قادر أقول مظلوم

إزاى أربي عيالي
إذا كان هو ده حالي
وضهري دايما مقطوم

إزاى إبني هايتعلم
وشايف أبوه بيتألم
مع كل طلعة يوم

إزاى كده أنا عايش
موجود .. بس بره الهامش
وماليش أى لزوم

مش لاقي ف بلدي مكان
ليه بس ؟ ده أنا إنسان
على حبها أنا مفطوم

قمنا وقولنا ياثوره
يمكن تدور الدوره
ونغير مصير محتوم

بدل الثوره .. كانوا إتنين
وف الإتنين شيلنا إتنين
وبرضه المقسوم .. مقسوم

ويعدي يوم ورا يوم
ومش لاقي جواب مفهوم
أنا ميت لابس توب العايش
واللا عايش في توب " المرحوم "

أشعار .. محمدعلي النقلي