طفلة رايحة وطفلة جاية
وطفل ماشي كمان وراه
بيت في حارة وسوره عالي
شاب ما سهرش الليالي
تفتكر قلبه اللي خالي
ليه حطام
كل ده ما بقاش كلام
الحقيقة المرة ظاهرة
عيدها يلا ألف مرة
قول ورايا ما ينتهيش
كان شارعنا زمان شراع
قول سفينة ف حضن باع
كانوا ناس
وف إيديهم شالوا فاس
فوق حصانهم رفعوا راس
ألف ميت وتحية ليهم
فين زمانهم قالوا راح
كان بيوتهم جنب بيتنا
عمري ما حسيت بغربة
كان ولادهم دول ولادنا
كنا نلعب حته بطة
قطة عامية وانا صاحية
كنا نجري نعلي صوتنا
واللي ساكت جوه بيته
نسمعوا بيقول كفاية
قوله كان كله كناية
كنا بنروح المدارس
كان مافيش إخوان وداعش
كان وطنا كلمة واحدة
والعزيمة واحدة واحدة
علموها للي دارس
يا سلام على مدرستنا
لما شفنا معلمتنا
المثالية بعينها
ربي راح علينا يعينها
والمدرس درع واقي
زي ما تدور السواقي
ولا ناظر مدرستنا
كل هيبة
جاتنا خيبة
فين دا قيمة كله راح
جاي يحسس عالجراح
السفن مالهاش شراع
قول زمانك هو هو
بس سر بقوله وحدي
إنسانياتنا تباع
بين إيدين العطشانين
يشربوا من دم بلدي
وانت تتفرج يا ولدي
كف إيدك راح يصقف
راح تفوق بعد الأوان
أمر جالك يلا نام
واسمعه من غير كلام
إوعى تسأل
إوعى تنطق كلمة واحدة
هو ناقص فيك مناهدة
يلا هات المستخبي
لاجل ما تحس بأمان
كله حاضر بس ماضي
حتى تتمد الأيادي
كله ضايع يوم فداك
وصفه قال انك ملاك
وصفهم معناه هلاك
كله غمض عينه لحظة
بعد لحظة
شفت شارعنا بعيني
قلت عيني
والعمى صابني بإرادتي
شايفه لغز بحله وحدي
شفت نفسي أسير في داري
حتى جاري اتخلى عني
قال خدوه
كلمته كات سيف في ضهري
هز بدني
كنت بحمي بكلمتين
بنته وابني في العرين
داس وباس
بس كله سلف ودين
أيوه كله سلف ودين
ليست هناك تعليقات:
إرسال تعليق