~~~~~~~~~~~~~
مين اللي قال إن السؤال
عن حظي ف الفرحه حرام ؟
مين اللي قال إن الكلام
لو هد ف الجدران محال ؟
مين اللي قال إن الشتا
لازم تكون إعصار وريح
مين اللي قال إن المطر
مش شئ مريح ؟
مين اللي قال إن اللي يضحك
مش جوه منه طير جريح ؟
آه منه آه الدمع آه
بيلملم الراحه معاه
بيخطف البسمه الوحيده
اللي انزوت فوق الشفاه
الجسر بيني وبين أمالي بينهدم
والخطوه ليه قدامها ميت مليون لغم ؟
وانا وسط كل الزحمه دي
بصرخ ( نعم )
راضي وقانع بالحياه
ولا مره طلعت مني آه
كاتم همومي جوه شرياني المريض
لحد م في يوم اتكتم
ودخلت دوامة المرض
ورضيت
وقلت الحظ حظي
مفيش قلق
ايه يعني حبة هم أو كومة وجع
طب م احنا ف الأوطان
عايشين علي هم وخدع
راضيين بأوحال المطر
وان قلنا لا
ايه راح يكون ؟
م دماغنا مضروبه ف حجر
وأهي دنيا عايشينها ف خطر
آهي دنيا عايشينها ف خطر
بقلم /إبراهيم فهمي المحامي
ليست هناك تعليقات:
إرسال تعليق