إسلام عامر
فاقد الذاكرة مش عارف أنا مين
لقيت نفسى فى غرفة الانعاش
ببكى وقلبى حزين
جسمى كلة معدوم الحركة
جوة الجبس محبوس
وراسى ملفوفة بشاش
ناس كتيرة كانت حواليا
منهم اللى بيبكى عليا
ويتعاتبوا ويتحاسبوا ويتخانئوا
مين السبب فى اللى جرى ليا
ومن كتر الوجع صرخت
بأعلى صوت فيا
قلت كفاية حرام عليكم
أنا كنت لمين فيكم ضحية
بدأوا يعرفونى بنفسهم
ويورونى صورى معاهم كلهم
صرخت تانى وقلت
الناس دى انا معرفهاش
نزف الجرح فيا
جه الطبيب يكشف عليا
قال لهم حالته خطر
ومنعهم من الزيارة تانى ليا
ربنا كتب له عمر جديد وعاش
ادونى فرصة اعالجه
وترجع ذاكرته ليه
لوكنتوا بتحبوه
سيبوه وامشوا
علشان ربنا يشفية
مشيوا وسابونى لوحدى
وسابوا لى صور الذكريات
مافتكرتش حاجة منها خالص
ولا لحظة واحدة
من الماضى اللى فات
مافتكرتش غير
حاجة واحدة كنت بحسها
صورة منحوتة جوة قلبى
لانسانة كنت بحبها
رسمت صورتها على الجبس
أول ما ايدى اتحركت
مع انى
مش فاكر عنوانها واسمها
يامين يروح يقول لها
انى كتير محتاج لها
ودوايا فى قربى منها
هية الوحيدة اللى فاكرها
من الناس والدنيا كلها
علشان قلبى معاها
واحساسى وروحى عندها
فاقد الذاكرة
مش عارف أنا مين
لقيت نفسى
فى غرفة الانعاش
ببكى وقلبى حزين
فاقد الذاكرة
ليست هناك تعليقات:
إرسال تعليق