عشان اعجب ..شعر عامية ...الهام شرف

وجمهوري كده يصقف
واكون محنة قدامهم
بحيييهم
واكون ناشز في أفكاري 
عشان اعجب
إشارة مني يتمنوا
ما دمت صريح
تجاه الريح
ولو حادت حكاياتي
عن المألوف
بكون مكشوف
عدد وألوف
ومين عارض بكون صاحي
انا الراوي 
عن الصبيان  اللي تاهوا بجد
عن البنت اللي شافت حد من ثانية بيهتك عرض
عن الطفل اللي باكي بجد وتاهت عنه حنية
عن الأم اللي بتدور وباتت فينا محنية
عن الأب اللي عاجز قوته يشبع كل أولاده
ما عادش ياكلها بالساهل وطن بينا بيتساهل
عن الحكم اللي حاكم فينا من برة
عن الخنقة اللي جوانا 
وأحلامنا ما عادت حرة
خلاص تهت في أفكارى
وضاعت صورة قدامي
رسمها العقل في مرارة
خلاص ضاع اللي إسمه الحق
خلاص منصورة يا باطل
دا كام شخص هنا فاضل
وقال الحكم بالشوري
لكن ذرية مبتورة
في غمضة عين 
كمين قاتل 
ومقتول اللي قال الحق من سنتين
أنا صاحي أنا نايم
دا تفسير اللي كان حاصل
خلاص قلمي بيتنازل
ما فيش تحصين