( خسارة)...شعر عامية...الهام شرف

هي الحكاية ألف ميل
مخبوط ف هجر الشقيانين
كل اللي قالوا اليوم دا هجرة بيفرحوا
ويخبطوا على باب عزول
حقدك يزول
جايلك بقول انا المسافر في الضحى
والدنيا مش متلخبطة
لكن فؤادي ليك يميل يادي العويل
صاحب عيال
هات يلا مال
علشان مرايا ملخبطة
وهناك سفينة مستنظرة
فيها أخويا اللي ما اتولد من بطن أمي لكن هقول انه جدع
أصل احنا مش معجون دلع
احنا اللي يمكن يوم نموت جوه الطريق اللي اتجهل
وان عشنا هندوق الوجع
بلدي هتوحش ميت صبي
ومفكرين إمتى اللؤى
لكن زميلي هناك بعتلي من يومين
صورته وواقف في الخلا
قاللي انبساط جوه البساط
أغراني اقول للوالدة يلا همي بجدعنة
راحت تخبط عالجيران
رجعت بجيبها كان ملان
متشجعة
لكن دموعها ف معمعة
حسيت يا أمي بلون رماد دولتي
قبل الوداع
حسيت كإني في السما
عمري اللي ضاع
حسيت كإن نداكي بيواسي الغريب
أصلي غريق جوه البحار الموجعة
شفت خيالك جوه بالي وانا صوتي عالي
وايدين بتتمد تعالي شفتك بعيد
واتصورت قدامي كل المعمعة
شفت ف دموعك يوم وداعي
صدقت كل اللى اتقرالي
صدقت كلمة قلتهالي
بلدك يا إبني أولى بيك
بيتك قصاد قدمك عنينك
وساعتها صممت أروح
زي ابن جاري
لكن يا ويلي الخوف ماليني
حاسس ضلام
بغرق في بحر مالوش قرار
قربت انام
خلاص بودع دنيتي
من غير صراع
كانت سفينة بلا شراع
قدام عنية كنيتي....
أصبحت من صنع العدا..يا خسارة تاهت دولتي
يا خسارة تاهت دولتي