( إحسبوا دموع الخلايق ) معوض حلمي

 قالوا عدت سنه كسرت ضهور الغلابه
أنا قلت كام من سنه عدت وسابت ديابه
والدنيا كما الغابه والدم نازل سيل
مابين قابيل وهابيل وحوش بتاكل زغابه
العمر بيمر والسنين أوهام
معرفش كام عدى وباقي كام
ويوم الفقير بيعدي كأنه دهر
هو اللي دفع المهر وغيره ف حضنها نام
إحسبوا دموع الخلايق
والشقوق ع الخد نهر
ف القلوب قايده الحرايق
والعيون مسكونة قهر
إحسبوا الأيام ف عيني
مرة ضحكة ودمعتين
ومرتين زايد أنيني
ع السكة تاهوا وحيرانين
إكتبوا حروفكم بحكمة
الكلمة تبني غيطان ودور
والسعادة ف بطن كلمه
والحروف ف الضلمه نور
إحسبوا الأحزان ف دمي
قولولي بكره شكله إيه
جاي غناوي يداوي همي
ولا ناوي يزيد عليه
إحسبوا الأحلام ف ذاتي
وافردوها سحابه فوق
ضفروها من صفاتي
واحضنوا الأفراح بشوق
ضفروها من صفاتي
واحضنوا الأفراح بشوق