من باب التغيير ..الهام شرف

من باب التغيير 
واللي انا عايش فيه
صابح بايت مش ذنبي
فكرت أكرر كل الناس جوه ظنوني
واظهر يوم ورا يوم شخصية جديدة تناسب عصري
كان التفكير من جوه القصر اللي انا ساكن فيه
وناديت على حشمي وخدامي
اليوم انا بعلن يا اخواتي إننا أصحاب
ولقيت في عنيهم كل الدهشة المنحطة
يبصوا لبعض وما فيش ولا كلمة
أصحاب ؟
إخواتي؟
وف وسط الدهشة جاني سؤال 
هو انا مين ؟ 
فين؟ 
وانتم إيه؟
والموقف كان محبوك بالقوة
وسمعت الضحكات العالية فيها نقد لحالي المستعصي
أخيرا.......!
بينا يلا
بقينا أصحاب القصر
ودوام الحال لا محال
دا زعيمنا لابس خلخال
وبيمشى كمان على إيده
يا سلام على دنيا بتتغير
العبد اتريق على سيده
وعملت انا نايم وقتيها
وتصرف منهم صحاني
خلاني أدوب جوه الهيصة
يا سلام على واحد وسطيهم
قاعد على كرسي بضليلة
وبيؤمر أو حتى بينهي
ولا حد بيسمع لأوامره
الصوت بقى عالي
والهيصة تلالي 
والناس تتلم
يا خسارة يا داري
بقه ده كان حالي 
أنا قلت اما اصحى وافاجئهم
ما عرفتش أصحى من تاني
ولقيتني بموت
والزفة بتاعتي في تابوت
والناس تنعيني يا ضلالي
وانا سامع لكن ملهي ف شىء تاني
بتحاسب حتى على كلامي
وزعيقي معاهم
بتمنى أرجع من تاني
وقالولي هترجع لكن شرط تكون إنسان
بتحب الناس والناس هتحبك ما تكونش أناني
فكرت ف موتي وتابوتي والزفة كمان
أنا أصل ما صدقت اتحاسب ومصيري كمان مكشوف قدامي
خليتني مكاني وما رجعتش
أنا أصلي أناني.
الهام شرف