حاتوحشنا يا رمضان ... كلمات الشاعر المبدع / يسري عثمان

القصيده الفائزه بالمركز الاول عاميه على مستوى مجموعة منتديات ومجلات تابعه لوزارة الثقافه والهيئه العربيه لحماية الحقوق الفكريه 
--------
حكيوه زجليه
------
حاتوحشنا يارمضان
------------
ولمة ناس وفيه زجمه 
وناس اهيه عايشه بالرحمه
قلوب ساكن وريدها الصبر
نفوس فيها حلاوة التمر
وناس ب الاهه تتوَجع
وتتمنى الزمان يرجع
وقالوا بكره جاى رمضان
لقيت الهم كان ياما كان
وفرحه للمكان عنوان
ايادى اتمدت بتحضن
ايد اعاديها
وبشرى وحكايه مش
عارف احكيها
ماهى ليله بألف ليله وليله
مرسومه بإيد منّان
وورد كتر ملى بستان
فيها الحسن والمعنى
دعا يارب جمعنا
وبلغنى ايها الملك السعيد
مولاى
وادرك شهر زاد الصباح
وسكتت عن الكلام المباح
واحكى ازاى وانا باجرى 
اقول ياسحور
حوارى الحته من بكره
ماليها النور
وانا صاحى وفين النوم
وانا بادعى يارب تدوم
وادى المدنه وصلاة الفجر
وادى الفرحه بليلة القدر
واعبى جوه قلبى واصر
بدعوه ب القبول توجع
ودمعه بتبكى وبتودع 
ليالى وفرحه والمدفع
بييجى بفرحه وبيمشى
دموع تملا فراغ رمشى
ولما الدمعه تملا العين 
يفرحنا بليلة العيد
بييجى يضمنا بفرحه
ويمشى يسبق المواعيد
وفرحة طفل وعيديه
وانا اللى نفسى مكويه
حاعيشك السنه الجايه؟
واقول واحشنا يارمضان