القلم الحزين ... قصيدة للشاعر / خالد المنصوري

مالك يا قلم حزين
مالك يا قلم حزين؟
مالك بتتكعبل فوق السطور
مش قادر تثور
تاه منك كلامك
ولا خايف يفلت زمامك
وأعصابك تفلت تثور
وتدوس وأنت ماشى ع الحروف
وتروح ضحية للظروف
بتبكى ما حد سامع شكوتك
ما حد قارى كلمتك
خايف تموت بحسرتك
ولابتهرب بعيد زى النسور
يا ما كنت شجاع جسور
جناحك بيحمى إللى انظلم
مالك يا قلم حزين؟
ماشى فوق السطور زى الكفيف
ولا مربوط بحبال اليأس تكتيف
ولا حروفك غرقت ف بحر الهم
مش لاقيه مجاديف
ولا خايف الحبر يتقص
ويتمسح بفرشة التحريف
مالك يا قلم حزين؟
رد القلم بصوت مكتوم:
بنكتب من سنين
بننزف الآه والأنين
بنعرض صراخ المجروحين
بس إللى شارى فينا مين؟
كله عطشان للحنين
وكله عن الصح افترق
والفكر جوانا احترق
وجف العرق
من فوق الجبين
ورحيق العطور
من كل الورود اتسرق
والفكر جوايا اتهشم زى القزاز
بقى باردمبقاش ينعاز
هامد خامد جامد
ناره مش قادرة تفور
وأنا والورق جانا فتورجانا نفور
ونويت أعيش فى صمت
أنا والحبر الحزين
نحكى لبعضينا الألم عن ذكريات
والصوت إللى مات
من سكات أصبح رفات
بعد ما الحلم جواه اتخنق
زى صوت المحرومين
مش ممكن أعيش
والدافع مافيش
قلم من كتر حزنه
أصبح ضرير
مش سامع صرير
عاجز وراقد فوق السرير
أعلنها صريحة
لازم أموت
واكتب فوق التابوت
نعى الوداع
وارسم على قبرى
نعش القلم
مالك ياقلم خزين
خالدالمنصوري