! وشوش الناس #الشاعرمحمدضباشه

ناس وشوشها وشوشة
لحبة ودع رايحين
وناس وشوشها كرمشت
من كتر السلف والدين
وناس بفقرها عششت
من زمان للحين
وناس وشوشها إتقسمت
ما بين دموع وأنين
وناس وشوشها إتبسمت
من نهبها شارين
وناس وشوشها حلال
فاهمه الكتاب والدين
بتصلي معانا هنا
وشافوها في الحرمين
وناس وشوشها حرام
كارهه لنا يومين حلوين
ووشوش باعتنا ببلاش
وضاعت مع الضايعين
ووشوش نالت الشهادة
علي يد المجرمين
ووشوش ما عجبها حد
وفي الأصل هم ملاعين
ووشوش بألف وش
بترود التعابين
ووشوش ما ليها وش
في القسوة ما تعرف لين
وكلها يا سادة وشوش
إتربت ما نعرف فين
فيها حكاية وشوش
طلعت فشوش بكاسين
مالت علينا بدهرها
وما عدنا عليها قادرين
أمتي نلقانا بوش
نقول صادق وأمين
وش من غير غش
ولا مكر يبان في العين
نصيحة مني شوف وشك
وبلاش تلخبطة بأسافين
خليه خلقة ربنا
بدل ما نشوفه كارهين
ونقول الله يلعنه
وتكتر عليه سكاكين
وتترحم وشوش نفسها
في حبة حنان وحنين