جواب لامى..#شيماء الغيطى

وحشتينى وحشتينى 
وحشتينى اوى جدا
وحشنى دعاكى
وقت الفجر مابيدن
وحشنى الحضن والضمه
وحشنى الضحك واللمه
وحشنى اترمى ف صدرك
واقولك عالوجع يامه
******
احب اقولك ان الدنيا
ف غيابك بقت ضلمه
وحمل كتافى زاد جدا
وخدت ف روحى ميت صدمه
وانى كبرت فوق عمرى
ومت فجلدى ميت مره
صبرت كتير على فراقك
ولاقدرتش احوش دمعى
حيطان البيت بتشتاقك
ابصلهم يزيد وجعى
واقول معلش كاس داير
وبكره هينطفى شمعى
بدونك كل شيئ مرر
وعيشتى طعمها اتكدر
وحتى العيد صبح مش عيد
ومش هاقادر اقول اكتر
محدش م الجيران لسه
بيطمن على حالى
وعمى ساعات اهو بيسأل
وبرضه ساعات اقول خالى
لكن ولا حد راح يملى 
براحك يامه الخالى
وف ختام الجواب ليكى
ياست الكل بادعيلك
واقولك الف مية رحمه
تجيلك يامه يوم عيدك
والفين ورده على قبرك
ومليون بوسه فوق ايدك
واقولك برضه ف ختامى
ياريت يامه تودينى
تعيدى الروح لايامى
واشوف صورتك قصاد عينى
تجيلى ف المنام دايما
واحكيلك وتحكيلى
ويرجع تانى مرجوعنا
وم الاول وحشتينى