قصيدة/ حلم
من ديوان / سيبنى أحلم
للشاعر / مصطفى فريد
قولتيلى زمان
أنا ما استغناش عن حبك أبدا
ولا رؤياك
قولتيلى كمان
من رقة صوتغك
ألقانى طايرة فى سماك
وان مره حاولت ابعد عنك
واعمل نسياك
ألقاك جواعيا بتوحشنى
حتى وأنا معاك
وإن رحت بعيد
يهجرنى العيد
وتشيلنى دموعى وترمينى
على جسر هواك
وان صادف مرة وقلت الآه
ألقانى بلهفه وشوق سبقاك
ميت ألف سلامة ياروح الروح
خد عمرى فداك
قولتيلى كتير
وكلام عديته بدون تفكير
عن حب قديم
عاش فيكى سنين
وحزين على قلبى اللى ما فهموش
ما أنا قلبى عبيط
غاوى تشخبيط
فى حيطان البيت
يرسم تصاوير
بصباع طباشير
ومابينهم بيت يجمع بينا
وصحيت وياريتنى
ما كنت صحيت
ما كنت لقيت
الوهم فى آخر سكتنا
مين بس يقول
أخلص ويخون
قلبك فى بداية رحلتنا
بقى دا معقول
أحلم ويكون
فى الحلم نهاية قصتنا
ليست هناك تعليقات:
إرسال تعليق