..... مين اللي قال.......
مين اللي قال ان الوداع
مش شئ حزين
هوه الوداع دا حاجه سهله
والا كلمه بين شفايف مجروحين
بيمر كده من غير علامه
والا سايب جرح نازف للسنين
شق ف جدار قلب اللي عاشق
واتقسم بين البينين
وازاي هتمشي بنص قلب
ونص قلبك راح يمين
هوه الوداع دا حاجه سهله
والا موتك بالحياه وبدمع عين
أوعي ترميني بسلام وتقول وداع
وتحطم القلب الحزين
أرجوك تحققلي المتاح
و تسيبلي من وقتك دقيقه كل حين
لو حتي تعمل مش شايفني
و ترمي نظره بطرف عين
مين اللي قال ان الوداع
مش شئ حزين
وازاي هتنسي رعش قلبك
لما بتزور كلمتي
وازاي هترميني بوداعك
طلقه صابت مهجتي
هوه اشتياقنا كان دا وهم
والا انت فاكر الوداع ترياق
هيشفي الروح ينسيك دنيتي
إنسي الفراق .. وانسي الوداع
وانسي الوجع وانسي الجراح
انسي الطريق اللي المفارق
فيه تغير سكتي
بس افتكر إن الوداع هوه الأنين
ظلم السنين
وكفايه كلمه اربع حروف تمحي الحياه
من دنيتي
مين اللي قال ان الوداع
مش شئ حزين
مين اللي قال
ليست هناك تعليقات:
إرسال تعليق