ضباب العند
من ديوان/وراح الخوف
للشاعر/ مصطفى فريد
كل حاجه حلوه بينا
منا ضاعت فى ثوانى
توهنا فى الأحزان بكلمه
وكل واحد كان انانى
ضلم الدمع العيون
والجفون دبلت
وتعبت م السؤال
إيه جرى لنا ؟
مين رصدنا ؟
ضيع الود إللى بينا
قلب مين اللى حسدنا
وانتهك حرمة قلوبنا
ليه ضعفنا ؟
وسيبنا حلم العمر يغرق
بين ضباب العند بينا
والغرور الله يسامحه
فوق غصون الحزن سطر
حكم إعدام المشاعر
مكانش فينا حد عارف
إيه مخبيه القدر
مين يصدق
إن كل الحب فينا
يموت ويدبل من عتاب
يدبحه صوت السكات
والعطش يملاه مواجع
نلقى حزن خصامنا راجع
ريح يكسر كل شئ
ونخسر العمر إللى باقى
والقلوب تصبح شراقى
ندور على كل السواقى
نحتمى بالذكريات
مسافات مابينا اتوسعت
ولما نسأل عن سبب
ما نلاقيش غير السكوت
وعند مليان بالغررور
منى أو منك سيان
ماهى كلمة فى شوية كلام
غيرت أجمل مافينا
السماح والحب
والعشرة القديمة
فى لحظة العند إللى كانت
وانتهت من بين إيدينا
دمرت فينا الحنين
ما عدش باقى لينا منها
غير دموع ذكريات
وقلوب بتكويها الآهات
وإبتسامات الأنين
فوق وشوشنا المدبوحين
بتبكى ع الحب إللى مات
ليست هناك تعليقات:
إرسال تعليق