كل أحلامي بقلم / سوزان عمادالدين

بقى عندي القدره انّي اتجرّأ
واسمع مزيكا بدون ما أحِّن
بقى عندي القدره اني أشوفك
وأخلي النَبض ف قلبي يكِن
بقي عندي برود وشعور جافي
مبقيتش في لِستة أهدافي
حُبك كان حِمل علي كتافي
دلوقتي انا قلبي صِغِر في السِّن

دلوقتي بجد انا ممكن اقول اني نسيتك
وصدقني أنا المرة دي مش بكدب
ومش بضحك ولا بمثل ولا بقولك كلام وخلاص
وليه اتعب ف احساسي
عشان واحد ملوش احساس
وليه اسهر وليه أبكي
وليه انا اشتكيك للناس
بقالي يومين مابفتكركش وبدمع
ولا بفكر ف ايامنا واقول نرجع
وسيرتك كل ما تجيني مابسمعهاش
حروف اسمك .. بقت لا تهز ولا توجع!
سنيني معاك بقت ماضي مبفتكروش
وعمري الجاي هيبقي اجمل من الماضي
هعيش عمري عشان وياك انا ماعشتوش
ومش هقبل اضيع عمري ع الفاضي
واحلامي اللي طول عمري بعيشها معاك
صحيت منها ولقيتها كابوس ووهم كبير
انا عمري ما كنت بخير وانا وياك
وطول الوقت كنت بمثل اني بخير!
وطول الوقت كنت بقول ياريت تفضل
لكن دلوقتي /انا بالفعل/ ندمانة..
معاك انا كنت مطفية
ووردة حزينة دبلانة
كإني كنت معمية وناسية إني انسانة
في حضنك عمري ما اتطمنت
وبردو فضلت بردانة!
مبفتكركش والله
ولا بتجيني ف منامي
ومش شايفاك ومش حساك
وحتى ان كنت قدامي
ودلوقتي انا قلبي بيتنفس
وعايشة بجد ايامي
أنا نسيتك ..
ودي كات كل احلامي.

بقلم / سوزان عماد الدين