الطاحـــــونة / قصيدة عامية
{{{{{{{{{{{{{{{{{{
ف التاريخ موجود حكاية
عايشة فيها ناس كتير
ناس بتزعل م الشّكاية
وناس بتتردّد كتير
ناس بترضى بأي حاجة
وناس بتسرق م الفقير
ناس بتاخد قوت عيالنا
وشايفة فينا لحم طير
وناس يادوبك عايشة يومها
وماشية فيها بالعسير
وناس حيارى
وناس سكارى
وناس دموع عينها غزير
المهم الكل داير ف الطّاحونة
بدون كلام
يتسرق ويقول نصيبي
آهي عيشة والسلام
هو أنا يعني اللي فيهم
غاوي أعمل إعتصام ؟
ما هو لو قلت ارحمونا
بيسجنوا فينا الكلام
يكتموا صوت الحقايق
والكلام بقى ليه لجام
إتمنعنا من الشّكاية
واتظلمنا بالجباية
شعب عايش ع الجراية
وان سألته يقول تمام
وان طلبت تنول معيشة
يسألوك هتعيش بكام ؟
وان حلمت تفوز بفرحة
يحرموك م الإبتسام
يعني عيشة بالشحاتة
والمهانة
واللجام
بس برضو الناس بتضحك
وف عينيها لون حزين
وف سكوتها ميت حكاية
حروف كلامها ع الجبين
تحكي عن أيام شقاها
واللي صابها م السنين
يوم ما صوت الحق طاطا
واتولدنا ميتين
كان زمان صوتنا سنابل
أو مَكَنْ
أو مبدعين
والقلوب للكل صافية
فيه مشاعر فيه حنين
الفرح يجمع ما بينّا
وف العزا كله حزين
اتقلبنا حاجة تانية
والفرح يخلص ف ثانية
اختلفنا
وساقنا خوفنا
واترمينا جوّه طين
واللي مش واقف معانا
يبقى خاين أو جبان
مستحيل نرضى بوجوده
جمب منا ف المكان
يعني أصبح كل واحد
فوق ملامحه ميت قناع
زي متعوزه هيرقص
ويخاطبنا بالخداع
والمصيبة الكل عارف
بس غاويين استماع
يدّعي بكلام بطولة
وهو واحد م اللي باع
أما باقي الناس غلابة
لسّه لابسه وشوش طيابة
ساكته وبتستنّي يمكن
شمس تشرق أو سحابة
أو أمل يظهر ف كلمة
تمحي إحساس الكآبة
هي دي بعض الحكاية
بس مش هيه النهاية
مستحيل الضلمة تفضل
والبشر يصبح بقايا ،،،،،،
بقلمي / إبراهيم فهمي المحامي
24/8/2019
ليست هناك تعليقات:
إرسال تعليق