الولد الشقى حلقه رقم 14
★★★★★★★★★★
بعدما تكلمنا عن المرحله الفارقه مرحلة الاعداديه مرحلة العصابات والشلل والاحتكاك الجغرافى أو العصبيه الجغرافيه يعنى بالأحرى انك تغضب لابن شارعك أو منطقتك أو ابن الحى وتأخذ فى شنطتك سلاحك إذا كان جايش بتاع اخوك الكبير او ققطعه خشبيه تدخل الشنطه أو قطعه حديديه أو المسطره المعدنيه المهم يكون معاك شئ لزوم الشئ ومع اول سفاره بتوع كفر الجبل بيتعاركوا مع بتوع السمان تلاقى امة لا إله إلا الله جاءوا من كل فج عميق وكانت كفر الجبل تشمل البطران والمنفى ... والسكان كانت تشمل التقسيم والسيسى تقوم العاركه من هنا تلاقى أشلاء الشنط والكتب والكراريس فى فناء الحوش ويوم العاركه ده فى المرواح نروح مع بعض تلاتين اربعين عيل كانت بتبقى عزوه وكل الحكايه والحوارات تحليل للعاركه وضحك وتهييص وشوفت انا عملت ايه وانا خدت الواد الفلانى مقلب ازاى وتفضل الحكاوى لمدة يومين تلاته على سيرة العاركه كأنهم دخلوا القدس
طبعا ماننساش أن أول مره اتعرض للمدرسين بتوع الدروس الخصوصيه أو مجموعات التقويه ويطلبوا مننا أن ندخل الدرس أو المجموعه جبرا وانا والله ماكنت اخدت درس قبل ذلك المهم مع الشد والجزر قاوحت ومرضيتش ادخل أى درس واصبح بينى وبين اغلب المدرسين مشاكل ومدخلتش أى درس الا فى تالته إعدادى لما كان الأستاذ مصطفى جعفر مدرس الانجليزى صاحبى وصديقى ورحنا فسحه لحديقة الحيوان مع بعض انا وهو وحوالى عشرة تلاميذ فقط رحله شخصيه علشان كده وافقت ادخل معاه درس انجليزى..
انتهت المرحله الاعداديه بحلوها ومرها وقبل ما تنتهى حدث حريق بالمدرسه احترقت فيه كل الملفات والأوراق الخاصه بالطلبه وبكل المدرسه وكانت شكلها من ولد بينه وبين الاداره ثأر علشان كتب على الابواب انا البرادعى يا رشدى اصل ده كان مسلسل شهير للفنان عبدالله غيث وأحمد توفيق كان مسلسل بوليسى فاقتبس منه المقوله دى انا البرادعى يا رشدى.
وبعد نهاية الاعداديه والمجموع الذى حصلته لا يتجاوز المدارس الفنيه فقررت اقبل التحدى وادخل المدرسه الثانويه التجاريه بنين ...
وكانت مدرسة المشاغبين أو العيال كبرت أو انت ضليع فى قواعد اللغه العربيه زى ما انت ضليع فى قواعد البقدونس والجرجير والفجل الرومى
والى حلقه أخرى والثانويه التجاريه ومعقل البلطجه والمخدرات ربنا يتوب علينا وعليكم
ليست هناك تعليقات:
إرسال تعليق