من باب الإحتياط ... قصيدة للشاعر / طارق المملوك

 من باب الاحتياط

****

انا اللى عايش ..

جوا شر الطيبة المثير ..

وانا اللى ماشى ..

وسط عتمة ضى ..

وانا الوحيد اللى احبابه .. الكتير ..

وانا العادى البسيط ..

و اللى ماله زى ..

انا الشاعر ..

وانا اللى العاشق بطبعى ..

بتخطفنى المشاعر ..

وانا الثائر ..

وانا اللى مستسلم للقضا ..

وعايش بعافر ..

عاشق تراب أرض الوطن ..

ولكنى .. المسافر ..

انا النسمة .. وانا البسمة ..

وانا الورده اللى ببعت لك .. عبير ..

انا العادى ..ومتدارى ..و وحيد ..

و بعرف من الناس الكتير ..

منطوى وعشقان .. اختلاط ..

.. "وده ..... من باب الاحتياط" ..

****

مُبْخت .. و محسود يا الجدع ..

مؤمن ومستني لى يوم ..

بصرخ .. و متحمل وجع ..

لكنى بتعلم .. واقوم ..

طرشان .. بتتمعشق سمع ..

والرنه متملاها .. لوم ..

انا اللى متعلق بغيرى ..

ومتقوقع ف ذاتى ..

عايش وبتفهم و قابل ..

لكنى ..

.. مستغرب حياتى ..

انا اللى بكتم جوا منى ..

وبغضب لك ..

ف كلماتى ..

واللى واقف بندهك ..

و بصرخ لك .. بهاتى ..

انا اللى معجون هرجله ..

وقضاها انضباط ..

عايش صلابة المرجله ..

برواز .. و صورة الانبساط ..

بعرف اصول الحنجله ..

لكنى دوغرى .. ومبدأى ..

.. "إعرفها من باب الاحتياط" ..

***

طارق المملوك