إيه اللى خلّا الشعر شاب ؟
كبر سنى ولّا خوفــى ؟
ولّا تفكيرى ف حروفـى؟
ولّا أيام العـــــــــــذاب ؟
إيه اللى خلّا الشعر شاب ؟
السهر طول الليالــــى؟
ولّا فكرى وقلبى خالى؟
ولّا هم الإغتــــــــــراب؟
إيه اللى خلّا الشعر شاب ؟
القرايه والكتابــــــــــــه؟
ولّا نوحى ع الربــــــابه ؟
ولّا جرح ف يوم ما طاب ؟
إيه اللى خلّا الشعر شاب ؟
حب جوّه القلب ضــــاع؟
ولّا واحد غالى بــــــــاع ؟
ولّا قلب ف لحظـــه داب ؟
إيه اللى خلّا الشعر شاب ؟
اللى شفته منّك انتى ؟
لما بعتى لما خنتـــــى ؟
ولّا آه حجم الخــــــــراب ؟
إيه اللى خلّا الشعر شاب ؟
إنهيارك ف البدايــــــــــه؟
قبل ما تم الحكــــــــايه ؟
ولّا ويل نار الغيــــــــــاب ؟
إيه اللى خلّا الشعر شاب ؟
موت ابويــــــــا ولّا أمّى ؟
ولّا اخويا وابن عمّــــــى؟
اللى كانوا بالنسبه لى باب
إيه اللى خلّا الشعر شاب ؟
نقص فعلا هرمونــــــــات؟
ولّا فقر كتير حاجــــــــات؟
ولّا زى ما قالوا انتســاب؟
إيه اللى خلّا الشعر شاب ؟
صدمتى ف الناس يجـــوز؟
وانى باخسر مش بافــوز؟
ولّا أصـــــــــــوات الكلاب ؟
إيه اللى خلّا الشعر شاب ؟
إنصهارنـــــــــــــا ف الآلام ؟
ولّا موتنا من الغــــــــــرام ؟
ولّا ظن وفجأه خــــــــــاب ؟
إيه اللى خلّا الشعر شاب ؟
ف النهايه الله أعلــــــــــم ؟
هوّ بس لوحده يعلـــــــــم ؟
السبب لو عنّا غــــــــــــاب ؟
شعر : طلعت سالم
ليست هناك تعليقات:
إرسال تعليق