قصيده عارفه البحر ؟ للاسناذ محمد عسل

عارفه البحر؟!
عدد الموج جواه أنا شاري...
أما المهر ؟!
مهرك كل كلام أشعاري...
طالبه حاجات؟!
عارف عارف يلا إختاري..
عاوزه القلب يكونلك بس؟
راضي وفوقه كمان أفكاري..
عاوزه كلام العين يتحس؟
حضن عنيكي هايصبح داري...
عاوزه ف حضني تلاقي أمان؟
أناهااحميكي ليلي نهاري...
أما حكاية خوفي عليكي...
أنا ف الخوف راح أولع ناري...
عارفه كمان راح أقولك إيه؟
أنا راح أقولك أكبر سر مابين أسراري...
فاكره الصوره لما أخدتها منك يوم؟
لما كسوفك تحت إديكي كان متداري؟
لما أخدت الورده الحلوه..
لما حكيتلك عن أخباري؟
لسه الصوره زي ما هي باخدها ف حضني..
لسه بقول ف عنيها أشعاري...
لسه الورده زي ما هي بلونها الوردي...
لسه كمان بسقيها أخباري...
عارفه كمان راح أقولك إيه؟
أنا راح أقولك إن الغربه زادت ناري...
أيوه أهي فاتت ست سنين...
هايكملهم شهري الجاري....
عمري ف يوم مااخترت أتغرب...
عمر ماكان البعد قراري...
لكن قلة حيلتي وأهلك...
مع أشواقي كات أعزاري...
غبت شهور وسنين ورجعت...
حاضن مهرك طول مشواري..
قولي لأهلك رغم الجرح ..
لجل عيونك راجع شاري.

بقلم. محمد عسل